တရုတ်အစိုးရမှ ဖမ်းဝရမ်းထုတ်ခံထားရသည့် “ ဝ” အရာရှိနှစ်ဦးကို ရာထူးမှထုတ်ပယ်လိုက်ကြောင်း “ ဝ” ပြည် သွေးစည်းညီညွှတ်ရေးတပ်မတော် UWSA/UWSP မှ ထုတ်ပြန်ကြေငြာ
တရုတ်အစိုးရမှ ဖမ်းဝရမ်းထုတ်ခံထားရသည့် “ ဝ” အရာရှိနှစ်ဦးကို ရာထူးမှထုတ်ပယ်လိုက်ကြောင်း “ ဝ” ပြည် သွေးစည်းညီညွှတ်ရေးတပ်မတော် UWSA/UWSP မှ အောက်တိုဘာ ၁၆ ရက်တွင်ထုတ်ပြန်ထားသည်။
ပြီးခဲ့သည့် အောက်တိုဘာ ၁၂ရက် ၌ “ ဝ” ပြည်သွေးစည်းညီညွတ်ရေးတပ်မတော် (UWSA) မှ အရာရှိ နှစ်ဦးကို မြန်မာ နိုင်ငံမှ အွန်လိုင်းလိမ်လည်မှုလုပ်ငန်းများနှင့် ပတ်သက်သည် ဟု ဆိုကာ တရုတ်အစိုးရမှ ဆုကြေးငွေနှင့်ဖမ်းဝရမ်း ထုတ်ခဲ့ခြင်းဖြစ်သည်။
အဆိုပါ ထုတ်ပြန်ချက်နှင့်ပက်သက်၍ UWSA ၏ ပြင်ပဆက်ဆံရေးတာဝန်ခံ ဦးညီရမ်း ကို MPA မှ ဆက်သွယ် မေးမြန်းရာ “ ဒီနေ့ပဲ (အောက်တိုဘာ ၁၆ ရက်) စာထုတ်တာ မှန်ပါတယ်။” ဟု Viber မှ တစ်ဆင့် အတည်ပြု ဖြေကြား ခဲ့သည်။
တရုတ်နိုင်ငံ၊ ပြည်သူ့လုံခြုံရေးဝန်ကြီးဌာန၊ ယူနန်ပြည်နယ်၊ ကူမင်ပြည်သူ့လုံခြုံရေးဌာန မှ ဖမ်းဝရမ်းထုတ်ထားသည့် ပေါက်အိုက်ပန်း (ဆောက်လုပ်ရေးဌာနကြီးမှူး) နှင့် အိုက်ဟော်(မိုင်းလင်းခရိုင်မှူး) တို့သည် တရုတ်နိုင်ငံ၏ ဥပဒေများကို ချိုးဖောက်ခဲ့ကြပြီး၊ ၄င်းတို့နှစ်ဦး၏ လုပ်ရပ်များသည် “ ၀” ပြည်၏ နိုင်ငံတကာနှင့်သော်လည်းကောင်း၊ အိမ်နီးချင်း နိုင်ငံ များနှင့်သော်လည်းကောင်း၊ ဆက်ဆံရေးကို အကြီးအကျယ်ထိခိုက်စေခဲ့ကြောင်း၊ ဝပြည်နှင့် အိမ်နီးချင်းနိုင်ငံများ၏ နိုင်ငံရေးအရအပြန်အလှန် ယုံကြည်မှုနှင့် မိတ်ဖတ်ဆက်ဆံရေးကိုလည်း ထိခိုက်စေခဲ့ကြောင်း၊ ထို့ကြောင့် “ ဝ” ပြည် သွေးစည်းညီညွတ်ရေးပါတီ ပေါ်လစ်ဗျူရိုအမြဲတမ်းကော်မတီအနေဖြင့်၊ အဆိုပါဖြစ်စဉ်ကို လေ့လာပြီးသည့်နောက် “ ဝ” ပြည်အစိုးရ၏ ဂုဏ်သိက္ခာနှင့် ပတ်ဝန်းကျင်နိုင်ငံများနှင့်မိတ်ဝတ်မပျက်ဆက်ဆံရေးကို ထိန်းသိမ်းရန်အတွက် ၎င်းတို့ ၂ ဦးကို ရာထူးမှထုတ်ပယ်လိုက်ခြင်းဖြစ်သည်ဟု UWSP ၏ ထုတ်ပြန်ချက်၌ ပါရှိသည်။
“ ဝ” ပြည်နယ်တွင် ဆက်သွယ်ရေးလိမ်လည်မှု့(ကျားဖျန်) လုပ်ငန်းများ ခေတ်စားလျက်ရှိပြီး၊ အဆိုပါလုပ် ငန်းအများစုကို တရုတ်နိုင်ငံသားများက ဦးစီးလုပ်ကိုင်နေကြခြင်းဖြစ်သည်။
အဆိုပါ လုပ်ငန်းများ၌ မြန်မာနိုင်ငံသားများသာမက၊ ထိုင်း၊ လာအိုနှင့် ကမ္ဘောဒီးယားနိုင်ငံသားတွေပါ ဆက်သွယ် ရေးလိမ်လည်မှု့(ကျားဖျန်) လုပ်ငန်းတွေမှာ အတင်းအကျပ်ရောင်းစားခံနေကြရတာတွေရှိပြီး၊ အစိုးရများအနေဖြင့် ထိထိမိမိအရေးယူသင့်ကြောင်း ကျားဖျန့်လုပ်ငန်းတွင် လုပ်ကိုင်ခဲ့ဖူးများက ပြောသည်။
“ အခုဆို တရုတ်အစိုးရကလည်း တင်းတင်းကျပ်ကျပ်ကိုင်တွယ်လာတယ်။ ဒါပေမယ့် အဲ့ဒီ့လုပ်ငန်းတွေကရှိနေတုန်းပဲ။ ဖမ်းတော့ဖမ်းတယ်ဆိုပေမယ့် ကြိုပြောပြီးဖမ်းတာ။ လုပ်ငန်းတွေက ပိုပြီး ကြီးထွားနေတုန်းပဲ” ဟု လောက်ကိုင်ရှိ ကျားဖျန့်လုပ်ငန်းတွင် လုပ်ကိုင်ခဲ့ဖူးသူတစ်ဦးက ပြောသည်။
ယခင်က တရုတ်-မြန်မာနယ်စပ်မြို့များနှင့် ထိုင်း-မြန်မာနယ်စပ်မြို့များ၌ လုပ်ကိုင်နေကြသည့် အွန်လိုင်း ငွေကြေး လိမ်လည်မှု လုပ်ငန်း(ကျားဖြန့်)များသည် စစ်ကောင်စီ အာဏာသိမ်းပြီးသည့်နောက် ရန်ကုန်၊ မန္တလေး၊ တောင်ကြီး၊ မြစ်ကြီးနား စသည့် မြို့ကြီးများရှိ အဆင့်မြင့်ဟိုတယ်များ၌လည်း တရားဝင်နီးပါး လုပ်ကိုင်မှုများရှိနေသည်ဟု ရန်ကုန်မြို့မှ စီးပွားရေးလုပ်ငန်းရှင်တစ်ဦးက ပြောသည်။
ပြီးခဲ့သည့် စက်တင်ဘာလဆန်းပိုင်းတွင်လည်း ဆက်သွယ်ရေးလိမ်လည်မှုဖြင့်၊ ပြစ်မှုကျူးလွန်သူ တရုတ်နိုင်ငံသား ၁၂၀၇ ဦး ကို “ ဝ” ပြည်နယ်ရဲတပ်ဖွဲ့မှ၊ တရုတ်နိုင်ငံရဲတပ်ဖွဲ့သို့ လွှဲပြောင်းပေးအပ်ခဲ့သည်။