ကရင်ပြည်နယ် မြဝတီမြို့နယ်ရှိ ရွှေကုက္ကိုလ်မြို့သစ်သည် ပြည်နယ်ဖွံဖြိုးမှု မဖြစ်စေဘဲ ပျက်ဆီးမှုကိုသာ ဖြစ်စေသဖြင့် တိုက်ခိုက်ရခြင်း ဖြစ်ကြောင်း ကော်သူးလေတပ် (KTLA) က ဧပြီ ၇ ရက်တွင် ကြေညာသည်။
Facebookတွင် ပျံ့နှံလာသော KTLA ဗဟိုဌာနချုပ် ရုံးထိုင်မှူး စောဝါးနေမူး လက်မှတ်ထိုးထားသည့် ကြေညာချက်အရ ရွှေကုက္ကိုလ်မြို့သည် မူးယစ်ဆေးဝါး ဖြန့်ဖြူးသုံးစွဲရောင်းချနေပြီး တိုင်းရင်းသူ အမျိုးသမီးများကို ပြည့်တန်ဆာအဖြစ် လိမ် လည်လှည့်ဖြားစေခိုင်းနေသည့် နေရာဖြစ်နေသလို စစ်ကောင်စီအတွက် တရားမဝင်ငွေကြေးများ ရှာဖွေပေးသည့် နေရာ ဖြစ်၍ ပြည်ပမှ အလုပ်သမားများကိုလည်း လိမ်လည်ခေါ်ဆို ခိုင်းစေမှုများ ရှိနေသဖြင့် KTLA အနေနှင့် ကရင်ပြည်နယ် အကျိုးအတွက် တိုက်ခိုက်ရခြင်းဖြစ်ကြောင်း၊ ထို့အတွက် ရွှေကုက္ကိုလ်တွင် နေထိုင်သည့် ပြည်သူများအနေနှင့် တိုက်ပွဲ ဧရိယာမှ ရှောင်ပေးကြရန် ထုတ်ပြန်ထားသည်။
ထိုကြေညာချက်နှင့် ပတ်သက်၍ ပိုမိုသိရှိနိုင်ရန် KTLA စစ်ဦးစီးချုပ် ဗိုလ်ချုပ်စောနယ်ဒါးမြကို ဧရာဝတီက ဖုန်းဖြင့်ဆက် သွယ်ခဲ့ရာ ၎င်း အလုပ်များနေသဖြင့် နောက်မှ ပြန်လည်ဆက်သွယ်ရန် ပြောဆိုသည်။
ကော်သူးလေတပ်နှင့် နီးစပ်သည့် သတင်းရင်းမြစ်တဦးကမူ ကြေညာချက်မှာ မှန်ကန်ကြောင်း၊ စစ်ကောင်စီတပ်နှင့် ကရင်ပူးပေါင်း တပ်များအကြား တိုက်ပွဲ ဆက်ဖြစ်နေကြောင်း ပြောသော်လည်း တိုက်ပွဲအခြေအနေ အသေးစိတ်နှင့် ပတ်သက်၍ ဖြေကြားရန် ငြင်းဆန်သည်။
KTLA ၏ Lion battalion Commando အဖွဲ့မှ ဧပြီလ ၆ ရက်ထုတ် ကြေညာချက်ရာ ဧပြီ ၅ ရက် မနက်ပိုင်းက ရွှေကုက္ကိုလ် ၏ အနောက်မြောက်ဘက်ရှိ ထီးကော်ထောရွာနှင့် အနောက်တောင်ဘက်ရှိ ထီးဝါပလောရွာတို့၌ စစ်ကောင်စီ လက်အောက်ခံ ကရင်ပြည်နယ်နယ်ခြားစောင့်တပ် (BGF) နှင့် တိုက်ပွဲများဖြစ်ခဲ့ပြီး BGF စခန်း ၅ ခုနှင့် လက်နက်မျိုးစုံ ၇၅ ခု သိမ်းဆည်းမိခဲ့ကြောင်း စစ်ကောင်စီတပ်ဖွဲ့ဝင် ၈၀ ကျော်သေဆုံးကြောင်း ထုတ်ပြန်သည်။
စစ်ကောင်စီတပ်ဘက်မှ ထိခိုက်သေဆုံးမှုများနှင့် ပတ်သက်၍ ဧရာဝတီက သီးခြား အတည်ပြုနိုင်ခြင်း မရှိပါ။
ရွှေကုက္ကိုလ်တိုက်ပွဲသည် Lion battalion တပ်ဖွဲ့ဝင် ၃ ဦးအား ထိုင်းအာဏာပိုင်များက ဖမ်းဆီးကာ ဧပြီလ ၁ ရက်တွင် BGF ထံ လွှဲပြောင်းပေးလိုက်သည့်နောက် ပေါ်ပေါက်လာသော တိုက်ပွဲလည်း ဖြစ်သည်။
ယင်းတိုက်ပွဲတွင် KTLA တပ်ဖွဲ့အပြင် BGF မှ ခွဲထွက်လာသည့် တပ်ဖွဲ့ဝင်များ ၊ ကရင်ငြိမ်းချမ်းရေးကောင်စီ (KNU/KNLA-PC) မှ ခွဲထွက်လာသည့် အရာရှိနှင့် စစ်သည်များအပြင် ကရင်အမျိုးသားအစည်းအရုံး (KNU) လက်အောက်ခံ စစ်ကြောင်း များလည်း ပါဝင်နေကြောင်း မြေပြင်သတင်းများအရ သိရသည်။
တိုက်ပွဲသည် ဧပြီလ ၈ ရက်တိုင်အောင် ဆက်ဖြစ်နေပြီး ရွှေကုက္ကိုလ်မှ တရုတ်လူမျိုးများသည်လည်း ထိုင်းနိုင်ငံ မဲဆောက် မြို့ဘက်သို့ ရွှေ့ပြောင်းမှုများ ရှိနေကြောင်း မြဝတီမြို့ဒေသခံ အချို့က ဆိုသည်။
အမည်မဖော်လို့သည့် မြဝတီဒေသခံ အမျိုးသားတဦးက “ကုက္ကိုလ်က တရုတ်တွေ ပြေးလာတာဟုတ်ပါတယ်။ တချို့လည်း ဝှေ့ရှမ်း (ရွှေကုက္ကိုလ်နှင့် သင်္ဃန်းညီနောင်ကြားကရွာ) ကို ရှောင်လာတယ်။ တချို့လည်း မဲဆောက်အထိ သွားကြတယ်။ အရေအတွက်တော့ မသိဘူး။ ပြေးလာတာတော့ ဟုတ်တယ်။ သူတို့က BGF နဲ့ ဆက်စပ်နေတော့ တိုက်ခိုက်ခံရမှာ ကြောက်လို့ ပြေးကြတာထင်တယ်” ဟု ဧရာဝတီကို ပြောသည်။
ရွှေကုက္ကိုလ်မြို့သစ်ထဲတွင်မူ တိုက်ပွဲကြောင့် စိုးရိမ်ထိတ်လန့်မှုရှိသော်လည်း စားသောက်ဆိုင်အချို့နှင့် ကာစီနိုအချို့ ဖွင့်ထားဆဲဖြစ်ကြောင်း၊ ရွှေက္ကိုလ်ဈေးအား ယာယီပိတ်ထားကြောင်း အဆိုပါမြို့ထဲမှ အမည်မဖော်လိုသည့် အမျိုးသားတဦးက ဧရာဝတီကို ပြောသည်။
လတ်တလောတွင် ရွှေကုက္ကိုလ် တိုက်ပွဲကြောင် ထိုင်းနိုင်ငံ မဲဆောက်မြို့အနီး သောင်ရင်းမြစ်ကမ်းသို့ ရှောင်လာသည့် စစ်ဘေးရှောင် ၈၀၀၀ ခန့်ရှိနေကြောင်း၊ လက်ရှိတွင် ထိုင်းအာဏာပိုင်များက စစ်ရှောင်များကို သောင်ရင်းမြစ်ဘေးရှိ ဆိတ်ခြံနှင့်နွားခြံဧရိယာထဲက နေရာ ၅ ခုတွင် ယာယီခိုလှုံခွင့်ပေးထားကြောင်း စစ်ရှောင်များကို ကူညီပေးနေသူအချို့ ထံမှ သိရသည်။
စစ်ဘေးရှောင်များကို ကူညီပေးနေသည့် နွေဦးရိပ်မြုံပရဟိတအဖွဲ့မှ ကိုမင်းသွေးသစ်ကလည်း စစ်ဘေးရှောင် အများစုမှာ ကလေးသူငယ်နှင့် သက်ကြီးရွယ်အိုများဖြစ်ကြပြီး စားနပ်ရိက္ခာလိုအပ်ချက်ရှိကြောင်း ဆိုသည်။
၎င်းက “အစားအသောက်က သိပ်မဝဘူး ထင်ပါတယ်။ မုန့်ထုပ်လေးတွေ လိုတယ်။ ကလေးတွေကို မုန့်ထုပ်ဝေတော့ လူကြီးတွေက ကျနော်တို့လည်း ဆာတယ်ပေါ့။ ဒီနေ့မနက်တော့ အဆာပြေစာ မုန့်ထုပ်လေးတွေ တော်တော်တော့ များပါတယ်။ ဒီနေ့ထပ်ပြီး သွားဝေလိုက်ပါတယ်။ လိုအပ်နေတာကတော့ နောက်ဘယ်လောက်အထိ နေရဦးမလဲ မသိတဲ့အခါကျတော့ ဆန်၊ ဆီ ၊ ဟင်းချက်စရာ ၊ အချိုမှုန့် ၊ ဆနွင်းမှုန့် ၊ ဆားအဲဒါတွေလိုတယ်ပေါ့။ မနက်ဖြန် တရက်တော့ အဲဒါတွေထပ်သွားလှူဖို့ရှိပါတယ်။ ကျနော်တို့နဲ့ စကားပြောတဲ့သူအများစုကတော့ တိုက်ပွဲငြိမ်တာနဲ့ အိမ်ပြန်ချင်တယ်လို့ ပြောကြတယ်” ဟု ဆိုသည်။
လတ်တလောတွင် တိုက်ပွဲသည် ထပ်ဖြစ်နိုင်သည်ဟု မြဝတီဒေသခံ အများစုက ယူဆနေကြသလို ကရင်ပူးပေါင်း တပ်များကလည်း မြဝတီမှ – ကော့ကရိတ်အထိ အာရှလမ်းမကို လုံးဝ အသုံးမပြုကြရန် မတ်လ ၇ ရက်က ကြေညာချက်ထုတ်ပြန်၍ လူထုကို အသိပေးထားသည်။
ထို့အပြင် အာရှလမ်းမ အချို့နေရာများတွင်လည်း ပူးပေါင်းတပ်များက ကုန်တင်ကားအချို့အား ကန့်လန့်ပိတ်၍ တား ထားကြောင်း မြဝတီမြို့ ဒေသခံအချို့က ဆိုသည်။
မြဝတီမြို့ခံ အမျိုးသားတဦးကမူ “မြဝတီမှာ စစ်ကောင်စီဘက်က လုံခြုံရေးတင်းကျပ်နေတယ်။ ၉ ရက် ၁၀ ရက်မှာ မြဝတီကို လာတိုက်မယ်လို့ သတင်းတွေထွက်နေလို့ ။ ကားက နည်းနည်းတော့ သွားကြတယ်။ ဒီနေ့ ဆန်ကားတွေ တက်လာတာ တွေ့တယ်။ အာရှလမ်းမအတိုင်းတက်လာတာပေါ့။ ပိတ်ထားလည်း တက်လာတာပဲ။ ထိုင်း-မြန်မာ ချစ်ကြည်ရေး တံတား ၁ ၊ ၂ ကတော့ ဖွင့်ထားပါတယ်” ဟုဆိုသည်။
ကရင်ပြည်နယ်၊ မြဝတီမြို့မြောက်ဖက် ၁၀မိုင်ခန့်အကွာ၊ ထိုင်း-မြန်မာနယ်စပ်ရှိ သောင်ရင်းမြစ်၏ အနောက်ဘက်ကမ်းတွင် တရုတ်လူမျိုးပိုင်ကုမ္ပဏီတစ်ခုဖြစ်သော မြန်မာရထိုက်ကုမ္ပဏီနှင့် ကရင်ပြည်နယ် နယ်ခြားစောင့်တပ်ဖြစ်သော ဗိုလ်မှူးကြီး စောချစ်သူတို့ပူးပေါင်းပြီး ၂၀၁၈ခုနှစ်တွင် ရွှေကုက္ကိုလ်မြို့သစ်စီမံကိန်းကို အမေရိကန်ဒေါ်လာ ၁၅ ဘီလီယံကျော်ခန့် ရင်းနှီး မြုပ်နှံကာ တည်ဆောက်ခဲ့ခြင်း ဖြစ်သည်။