ကရင်ပြည်နယ်မှာ အခြေစိုက်ထားပြီး ကမ္ဘာတဝန်းကို ဖြန့်ကျက်နေတဲ့ တရုတ်လူလိမ်ဈေးကွက်

 

မြန်မာ-ထိုင်း နှစ်နိုင်ငံအကြား အဓိက ကုန်သွယ်ရေးလမ်းကြောင်းပေါ်မှာရှိတဲ့ မြဝတီမြို့ဟာ အကျင့်ပျက်ခြစားမှုတွေနဲ့ လျော့ရဲနေတဲ့ တရားဥပဒေစိုးမိုးရေးအောက်မှာ တရုတ်လူလိမ်တွေ အခြေစိုက်ရာ စားကျက်မြေတခုသဖွယ် ဖြစ်လာနေပါတယ်။

ကန့်ကွက် အငြင်းပွားမှုတွေ၊ ဥပဒေမဲ့ လုပ်ဆောင်မှုတွေကြောင့် လူထုကြားမှာ ဟိုးလေးတကြော်ဖြစ်ခဲ့တဲ့ စစ်တပ် လက်အောက်ခံ ကရင်နယ်ခြားစောင့်တပ် (BGF) ထိန်းချုပ်ရာဒေသက ရွှေကုက္ကိုလ် တရုတ်မြို့သစ်စီမံကိန်း အစပြုလို့ တရုတ်တွေဟာ နယ်စပ်မြို့တခုဖြစ်တဲ့ မြဝတီကို ထောင်နဲ့ချီ အလုံးအရင်းနဲ့ ဝင်ရောက်လာခဲ့တာ ဖြစ်ပါတယ်။

               

                               မြဝတီမြို့ (ဓာတ်ပုံ – Google Earth)

လက်နက်ကိုင်လှုပ်ရှားမှုတွေ ရှိနေတဲ့ မြဝတီခရိုင်ဒေသကို အဓိကအနေနဲ့ စစ်တပ်နဲ့ စစ်တပ်လက်အောက်ခံ လက်အောက်ခံ BGF က ဗိုလ်မှူးကြီးစောချစ်သူနဲ့ ဗိုလ်မှူးမုတ်သုန်တို့ ဦးဆောင်တဲ့ တပ်ဖွဲ့တွေက ထိန်းချုပ်ထားပြီး တရုတ်ရင်းနှီးမြုပ်နှံသူတွေနဲ့ အကျိုးတူစီးပွားဖက်တွေအနေနဲ့ လုပ်ဆောင်နေကြတာတွေလည်း ရှိကြပါတယ်။

သူတို့ဟာ ကျဉ်းမြောင်းတဲ့ နယ်စပ်သောင်ရင်း မြစ်ကမ်းတလျှောက် လောင်းကစားရုံကြီးတွေဖွင့်ပြီး လိမ်လည် ငွေရှာကြ သလို လူကုန်ကူးတာ၊ အတင်းအဓမ္မစေခိုင်းတာ၊ လုပ်အား ခေါင်းပုံဖြတ်တာတွေကိုလည်း ကျူးလွန်နေကြတယ်လို့ ကိုယ် တိုင်ကြုံတွေ့ခဲ့ရသူတွေက ပြောပါတယ်။

ဟုန်အွမ်ဆိုတဲ့ လောင်းကစားရုံမှာ ၁ လကျော် လုပ်ကိုင်ခဲ့ပြီး လျော်ကြေးပေးပြန်ခဲ့ရသူ တဦးက “မင်း ရောက်သွားပြီ ဆိုတာနဲ့ မင်းငွေညှစ်ခံရမှာပဲ။ ဘာမှ ဥပဒေဆိုတာ မရှိဘူး။ သူတို့ ပါးစပ်ထဲမှာပဲ။ သူတို့ခိုင်းတာ အကုန် လုပ်ရမယ်။ မလုပ်ရင်လည်း ဘေးမှာက သူတို့ လုံခြုံရေးခန့်ထားတဲ့ သူတွေနဲ့” လို့ ပြောပါတယ်။

ဟုန်အွမ် လောင်းကစားရုံဟာ မြဝတီမြို့ အမှတ် (၁) ဂိတ်အနီးမှာ တည်ရှိပြီး အမှတ် (၄) ဂိတ်နဲ့ ၉၉၉ ဂိတ်ဟောင်း နေ ရာတွေမှာလည်း အလားတူ လောင်းကစားရုံကြီးတွေ ဖွင့်လှစ်လုပ်ကိုင်နေကြတယ်လို့ ဆိုပါတယ်။

လောင်းကစားရုံပိုင်ရှင် သူဌေးဆိုသူတွေကတော့ တရုတ်ပြည်မကလာတဲ့ တရုတ်လူမျိုးတွေ ဖြစ်တယ်လို့လည်း လုပ်ကိုင်ခဲ့ သူတွေက ပြောပါတယ်။

                    

                               မြဝတီမြို့ သောင်းရင်းမြစ်ကမ်းတွင်တွေ့ရသည့် ကာစီနိုရုံတခု

၉၉၉ ဂိတ်နားက ဟိန်းစိန် – ၂ လို့ခေါ်တဲ့ Elephant ကုမ္ပဏီမှာတော့ ရာဂဏန်းရှိတဲ့ တရုတ်တွေနဲ့အတူ ထိုင်းနိုင်ငံသားတွေလည်း လာရောက် လုပ်ကိုင်နေကြပြီး ကာစီနိုလောင်းကစားတွေ၊ KTV၊ အပျော်ခန်းတွေ၊ ဂိမ်းတွေနဲ့ အွန်လိုင်းကနေ လိမ်တဲ့ အလုပ်တွေ လုပ်ကိုင်ကြပါတယ်။

အဆိုပါ ဟိန်းစိန်လောင်းကစားရုံတခုထဲမှာပင် အလုပ်ဌာနအသီးသီးမှာ မြန်မာတိုင်းရင်းသားလူငယ်တွေ အပါအဝင် ဝန်ထမ်းတထောင်ခန့်နဲ့ လည်ပတ်လုပ်ကိုင်နေကြတာဖြစ်တယ်လို့ လုပ်ကိုင်ခဲ့သူတဦးက ခန့်မှန်းထားပြီး ဒီလိုလောင်းကစားရုံးတွေဟာလည်း မြဝတီမြို့မှာ ၁၀ ခု ထက်မနည်းရှိနိုင်တယ်လို့ ဆိုပါတယ်။

သူတို့ရဲ့ မြင့်မားတဲ့ လစာငွေနဲ့ မြူဆွယ်ထားတဲ့ အလုပ်တွေကို ငွေရှာဖို့ မျှော်လင့်ချက်နဲ့ လာရောက်လုပ်ကိုင်ကြတဲ့ တိုင်းရင်းသား လူငယ်အများစုဟာ ရောင်းစားခံရပြီးနောက် လူတွေကို လိမ်လည်ငွေရှာရတဲ့ အလုပ်တွေ အဓမ္မစေခိုင်းခံရပါတယ်။

ဒါ့ပြင် လစာ ခေါင်းပုံဖြတ်တာတွေကြောင့် နောက်ဆုံးမှာ သူတို့ပြောတဲ့ လျော်ကြေးပေးပြီး ပြန်ထွက်လာကြရတယ်လို့လည်း ကိုယ်တိုင်ကြုံခဲ့ရသူတွေက ပြောပြပါတယ်။

ဂိတ် (၁) လောင်းကစားရုံမှာ အလုပ်လုပ်ခဲ့ပြီး ဘတ်တသောင်းခွဲ လျော်ပေးခဲ့ရတဲ့ လူငယ်တဦးက “သူဌေးဆိုသူတွေက တ ရုတ်ပြည်က လာတဲ့သူတွေ။ မြဝတီမှာပဲ တရုတ်တွေ အချင်းချင်း ဟိုဘက်၊ ဒီဘက် ရောင်းစားတာလည်း ရှိတယ်။ သူငယ် ချင်း တယောက်ဆို ဘတ်ကိုးသောင်းနဲ့ ရောင်းစားခံလိုက်ရတယ်” လို့ ပြောပါတယ်။

ဒီလို ရောင်းစားခံနေရသူတွေထဲ တရုတ်တွေ၊ ထိုင်းတွေလည်းပါဝင်ပြီး မြန်မာပြည်ဖွား တရုတ်လူငယ်တွေနဲ့ ကချင်၊ ရှမ်း ပြည်နယ်ဘက်က တိုင်းရင်းသားလူငယ်တွေလည်း ပါဝင်ကြတယ်လို့ သိရပါတယ်။

                          

                                                                    မြဝတီမြို့

“ဝန်ထမ်းအားလုံးနီးပါးက ရောင်းစားခံထားရတာ။ တရုတ် တယောက်ဆို ယွမ် ၃/၄ သိန်းနဲ့ ရောင်းစားလိုက်တာ။ သူဆို ဘဝ ပျက်ပြီ။ ဒီမှာရှိတဲ့ တရုတ်ကုမ္ပဏီတွေမှာပဲ ဟိုဘက်ကူးလိုက်၊ ဒီဘက်ကူးလိုက်နဲ့ လည်နေတယ်” လို့ လူငယ်တဦး က ပြောပြပါတယ်။
သူတို့လို အဓမ္မစေခိုင်းခံရပြီး လျော်ကြေးပေးမှ ပြန်ခွင့်ရခဲ့တဲ့ လူငယ်အများကြီးထဲကမှ ဝူချင်းဟုန်ဆိုသူကတော့ ၉၉၉ ဂိတ် နားက လောင်းကစားရုံကနေ လွတ်မြောက်လာခဲ့တာ ဖြစ်ပါတယ်။

တရုတ်စာတတ်တဲ့ ဝူချင်းဟုန် အနေနဲ့ လစာတရုတ်ယွမ်ငွေ ၇ ထောင် (ကျပ် ၁၄ သိန်းခန့်) ပေးမယ့် အလုပ်ခေါ်စာ တခုကို အွန်လိုင်းမှာ တွေ့ရှိရာကနေ မြဝတီမှာ အလုပ်သွားလုပ်ဖို့ ဖြစ်လာခဲ့ပါတယ်။ သူ့အနေနဲ့ လူတွေကို လိမ်လည်ပြီးမှ ငွေ ရှာပေးရမယ်လို့တော့ တွေးထင်မထားမိဘူးလို့ဆိုပါတယ်။

ဝူချင်းဟုန်က “ဘာအလုပ်လဲ ရေရေရာရာ မပြောဘူး။ တရုတ်စာ၊ အင်္ဂလိပ်စာ နည်းနည်းပါးပါးရရင် ရတယ်။ လာခဲ့ဆိုတာ ပဲ။ အာဏာ သိမ်းထားချိန်ဆိုတော့ ရန်ကုန်မှာလည်း နေလို့ သိပ်အဆင်မပြေတာရယ်၊ စားဝတ်နေရေးနဲ့ ကိုယ်တတ်ထား တာလေး အသုံးချရမယ်ဆိုပြီး သွားဖြစ်တော့တာပဲ” လို့ ပြောပြပါတယ်။

အလုပ်ကို ရောက်တဲ့အခါမှာတော့ လိမ်လည်ငွေရှာပေးရတာတွေကို မလုပ်နိုင်ရင် သူတို့သတ်မှတ်တဲ့ လျော်ကြေးပေး ရတော့မှာဖြစ်ပြီး မပေးနိုင်ပါက တခြားတရုတ်ကုမ္ပဏီကို ရောင်းစားခံလိုက်ရမှာပဲ ဖြစ်ပါတယ်။

ဒီအခြေအနေကို ဝူချင်းဟုန်တယောက် အလုပ်ကိုရောက်ပြီး တလနီးပါးအကြာမှာ သိလာရတာပါ။

“မင်းတို့ကို လူတယောက်က ၁ ဦးကို ဘတ်နှစ်သောင်းခွဲနဲ့ ရောင်းစားသွားပြီ။ မင်းတို့ ၆ လလောက်တော့ အလုပ် လုပ်ပေး ရမယ်။ မလုပ်နိုင်ရင် အဲဒီ ငွေလျော်ပေးရမယ်။ မလျော်နိုင်ရင် ပိုက်ဆံပြန်ရအောင် တခြားကုမ္ပဏီကို ပြန်ရောင်းစားမယ်” လို့ သူဌေးဆိုသူတွေရဲ့ ခေါ်ယူပြောဆိုတာ ခံခဲ့ရပါတယ်။

                      

                                                     ထိုင်းဘက်မှ မြဝတီမြို့အဝင်

ဒါ့ပြင် “မင်းတို့ ဒီမှာက ဘတ် ၂၅၀၀၀ ပဲ။ ရွှေကုက္ကိုလ်ရောင်းလိုက်ရင် ဘတ် ၅ သောင်း ဖြစ်သွားလိမ့်မယ်” လို့လည်း ခြိမ်းခြောက်ပြောဆိုတာတွေ ရှိတာကြောင့် ရောက်လာတဲ့ လူငယ်အများစုဟာ ချက်ချင်းလျော်ကြေးပေး ပြန်ထွက်ဖို့ မဖြစ် နိုင်တဲ့အတွက် ၁ လနီးပါးကြာ အလုပ်လုပ်ခဲ့ရတယ်လို့ ဆိုကြပါတယ်။

ဝူချင်းဟုန်နဲ့ အလုပ်အတူတူ လုပ်ကိုင်ခဲ့တဲ့ လူငယ်တဦးကလည်း “မလိမ်နိုင်ရင် ဖိအားပေးတယ်။ အလုပ်ထုတ် မယ် ပြောတယ်။ ကျနော်ကြုံတာတော့ မက္ကစီကိုတွေကိုက လိမ်လို့ မရဘူး။ ထိုင်းတွေကျတော့ လိမ်ရလွယ်တာပေါ့။ Line application ကနေ ဆက်သွယ်ရတာ” လို့ ပြောပါတယ်။

တရုတ်တွေအနေနဲ့ နိုင်ငံအလိုက် ဘဏ်၊ ချေးငွေလုပ်ငန်းစတဲ့ ဝက်ဆိုဒ်အတုတွေကို ဖန်တီးကာ လူတွေဆီက အဆင့်ဆင့် လိမ်လည်ပြီး ငွေရှာကြတဲ့အထဲ ဝူချင်းဟုန်တို့လည်း ကုမ္ပဏီက ဖန်တီးထားတဲ့ Chang Thai Loan လို့ခေါ်တဲ့ ထိုင်းငွေချေးလုပ်ငန်း ဝက်ဆိုဒ်အတုကိုသုံးကာ ငွေလိမ်ခဲ့ကြရပါတယ်။

အဲဒီဝက်ဆိုဒ်မှာ ဘတ်သုံးသောင်းကနေ သုံးသိန်းအထိ ချေးငွေလျှောက်နိုင်တယ်လို့ ဖော်ပြထားပြီး သူတို့အနေနဲ့ လျှောက် ထားသူကို စာရွက်စာတမ်းကြေး သွင်းခိုင်းတာ၊ တနှစ်စာ အတိုးသွင်းခိုင်တာမျိုးတွေကို တဆင့်ချင်း အဆင့် ၆ ဆင့်လောက် နဲ့ ယုံကြည်အောင် ပြောဆိုပြီး လိမ်ရတာ ဖြစ်တယ်လို့ ဆိုပါတယ်။

သူ ရောက်ရှိချိန်မှာတော့ ကုမ္ပဏီအနေနဲ့ လိမ်လည်တာတွေကို မက္ကစီကို၊ ဘရာဇီး၊ ထိုင်းနိုင်ငံတို့မှာ လုပ်ကိုင်ဖို့ ပရောဂျက် ရှိထားပြီး သူ့အနေနဲ့တော့ ထိုင်းနိုင်ငံက သူတွေကို အဓိက ပစ်မှတ်ထား လုပ်ကိုင်ခဲ့ရသလို တချို့သော တရုတ်တွေနဲ့ ထိုင်းတွေကတော့ လန်ဒန်၊ အိန္ဒိယတို့အထိ ဆက်သွယ်နေတာတွေ ရှိတယ်လို့ ဝူချင်းဟုန်က ပြောပြပါတယ်။

“တချို့ကျတော့ ပထမအဆင့်လောက်မှာပဲ လိမ်မှန်းသိလို့ နောက်ဆုတ်သွားကြတယ်။ တကယ်ငွေလိုနေတဲ့သူကျတော့ ဒီမှာ ပိုက်ဆံကလည်း ထုတ်လို့ရတော့မယ်လို့ ယုံကြည်နေတယ်။ တဖက်မှာကလည်း ဘတ် ၄ ထောင် လောက် က ပေးထားပြီးပြီ။ ထပ်မပေးရင်လည်း အဲဒါက ဆုံးတော့မှာဆိုတော့ ရှာကြံပြီး ထပ်ပေးရတော့တာပဲ” လို့ ကိုယ်တိုင်လုပ်ခဲ့ ရသူ တဦးက ပြောပါတယ်။

အဲဒီလို လိမ်လည်တဲ့အခါ ၇ ယောက်လောက်ပါတဲ့ အဖွဲ့လေးတွေနဲ့ လုပ်ကိုင်ကြပြီး ၁ လ ပြည့်ပါက တဖွဲ့ကို ဘတ်သိန်းနဲ့ချီ ရကြတယ်လို့လည်း လုပ်ကိုင်ခဲ့သူတွေက ပြောပါတယ်။

ဒီလို လိမ်လည်တာတွေအပြင် We Chat လို လူမှုကွန်ရက်စာမျက်နှာတွေမှာ အကောင့်တုတွေသုံးပြီး မြူဆွယ်လိမ်လည် တာ၊ Sex Chat ပြောပြီး ငွေချူခိုင်းတာတွေလည်း ရှိတယ်လို့ သိရပါတယ်။

“တခြားသူတယောက်ရဲ့ ပုံနဲ့အကောင့်ဖွင့်ပြီး စကားလိုက်ပြောရတာ။ ကိုယ်သုံးထားတဲ့သူရဲ့ ပုံတွေ၊ ဗီဒီယိုဖိုင်တွေ အကုန် လုံး ကုမ္ပဏီက အကုန်ပေးထားတယ်။ အဲဒီလူရဲ့ လမ်းလျှောက်နေပုံ၊ စားနေပုံ အကုန် သူတို့မှာရှိတယ်။ တဖက်က ဆက် သွယ်ရမယ့်သူရဲ့ ဖုန်းနံပါတ်တွေလည်း သူတို့မှာရှိတယ်” လို့ မြဝတီ ၁ ဂိတ်အနီးက ကုမ္ပဏီမှာ လုပ်ကိုင်ခဲ့တဲ့ လူငယ်အမျိုး သားတဦးက ပြောပါတယ်။

တဖက်က ယုံကြည်ပြီး ရင်းနှီးလာချိန်၊ ချစ်သူဖြစ်လာချိန်မှာတော့ ကုမ္ပဏီကပဲ ဖန်တီးထားတဲ့ ဂိမ်းတွေ ဆော့ခိုင်းပြီး ငွေ သွင်းခိုင်းတာ၊ ငွေလွှဲခိုင်းတာတွေ လုပ်ကြရတယ်လို့ ဆိုပါတယ်။

ဒီလို အကောင့်တုနဲ့ ပြောဆိုရတာကို တိုင်းရင်းသား လူငယ်အမျိုးသမီး တယောက်ဖြစ်တဲ့ နော်အယ်စေး (အမည်လွှဲ) က လည်း လုပ်ကိုင်ခဲ့ရပြီး နောက်ပိုင်းမှာ ကိုယ့်ပုံအမှန်တွေသုံးကာ လုပ်ရမယ်ဆိုလာတာကြောင့် ဆက်မလုပ်ဖြစ်ခဲ့ဘူးလို့ ပြောပါတယ်။

သူက “သူတို့က အင်္ဂလိပ်စာ မတတ်ဘူး။ ကျမက အဲဒီ တရုတ်ဘေးကနေထိုင်ပြီး တဖက်က အင်္ဂလိပ်လို အသံမက်ဆေ့ ပို့တာကို စာနဲ့ပြန်စီပေးရတယ်။ သူတို့ကမှ စာကိုဘာသာပြန်ပြီး ပြန်ပြောကြတာပေါ့။ နောက်ပိုင်းတော့ ညီမတို့ကို ကိုယ့်ပုံ ကိုယ်သုံးပြီး Sex Chat ရမယ်ပြောလာရော။ ကျမ သူငယ်ချင်းတယောက်ကိုဆို Sex Chat လုပ်ရမယ်၊ ဓာတ်ပုံတွေ ရိုက်ရမယ် ဆိုတဲ့အထိပါ ပြောလာတာ” လို့ ပြောပြပါတယ်။

သူ့အနေနဲ့ သူငယ်ချင်းဖြစ်သူရဲ့ ဆက်သွယ်ပြောကြားမှုနဲ့ လာရောက် လုပ်ကိုင်ဖြစ်ခဲ့တာဖြစ်ပြီး ၁ လခန့် လုပ်ကိုင်အပြီး မှာ လျော်ကြေး ဘတ် ၅၀၀၀ ပေးပြီး ပြန်လာခဲ့တယ်လို့လည်း သူက ဆိုပါတယ်။

တရားမဝင် လောင်းကစားနဲ့ လိမ်လည်တာတွေ လုပ်နေရတဲ့ လူငယ်တွေ လစာအနေနဲ့ အလုပ်ခေါ်စဉ်ကလို ယွမ် ၆၀၀၀၊ ၇၀၀၀ မရရှိတော့ဘဲ ကုမဏီဘက်ကပေးတဲ့ ဘတ် ၁၀၀၀၀ ဆိုလည်းယူ၊ ၁၅၀၀၀ ဆိုလည်းယူရတဲ့ အနေအထား ဖြစ်ကုန်ပါတယ်။

ဝန်ထမ်း တယောက်အနေနဲ့ ပိုက်ဆံ မလိမ်နိုင်တာ၊ တစုံတရာ အမှားလုပ်မိတာဆိုရင်လည်း နေထိုင်ရတဲ့ အဆောင်ရှေ့ မှာ ဖားခုန်ခိုင်းတာ၊ ဒိုက်ထိုးခိုင်းတာ၊ ထိုင်ထလုပ်ခိုင်းတာတွေလို သိက္ခာကျအရှက်ရစေတဲ့ အပြစ်ပေးတာမျိုးတွေလည်း သူဌေး ဆိုသူတွေက လုပ်တတ်ကြတယ်လို့လည်း ကိုယ်တိုင်မြင်ခဲ့ရတဲ့ ဝူချင်းဟုန်က ဆိုပါတယ်။

ဒါ့ပြင် အတင်းအဓမ္မစေခိုင်းပြီး ပြင်းထန်တဲ့ ဒဏ်ပေးမှုတွေကြောင့် တရုတ်အချင်းချင်း လူသတ်မှုတွေဖြစ်တဲ့အထိ ကြုံတွေ့ခဲ့ ရတယ်လို့လည်း သူက ပြောပါတယ်။

သူက “အဲဒီထဲမှာ ရောင်းစားခံထားရတဲ့ တရုတ်တယောက်ကို သူဌေးလို့ ခေါ်တဲ့လူက ထမင်းလည်း မကျွေးဘူး။ အိပ်စရာ လည်းမပေးဘဲ ၄ ရက်လောက် ထားထားတယ်။ အဲဒီအချိန်မှာ သူက ဆိုင်ကနေ ဓားတချောင်းယူပြီးတော့မှ သူဌေးလို့ခေါ် တဲ့လူကို ဗိုက်ကိုထိုးတယ်၊ လည်ပင်းကိုထိုးပြီး ဓားကိုလှည့်လိုက်တော့ လည်ပင်းက ပြတ်မလိုဖြစ်သွားတာ။ ကျနော်တို့ ရှေ့ မှာတင် ဖြစ်သွားတာ။ ဒါမျိုးတွေ ကြုံရတော့ အရမ်းလန့်သွားတယ်” မြင်တွေ့ခဲ့ရတဲ့ အခြေအနေကို ပြန်ပြောပြပါတယ်။

ပြီးခဲ့တဲ့နှစ် မတ်အတွင်းမှာတုန်းကလည်း မြဝတီမြို့ ကမ်းနားလမ်း၊ သဲပုံဆိပ်အနီးမှာ ဓာတ်ပုံမှတ် တမ်းရိုက်နေတဲ့ မြန်မာသတင်းထောက်နှစ်ဦးကို ကာစီနိုတခုရဲ့ တရုတ်လုံးခြုံရေးအဖွဲ့တွေနဲ့ နယ်ခြားစောင့်တပ်ဖွဲ့ဝင်တွေက ဖမ်း ဆီးကာ ထိုးကြိတ်ရိုက်နှက်တာတွေအပြင် တောထဲခေါ် လက်စဖျောက်ပစ်ဖို့အထိပါ လုပ်ဆောင်ခဲ့ပါ သေးတယ်။

သတင်းထောက်နှစ်ဦးကတော့ ဖမ်းဆီးခံရတဲ့အကြောင်း ဖုန်းမက်ဆေ့နဲ့ရုံးကို အချိန်မီ အကြောင်းကြားနိုင်ခဲ့တဲ့ အတွက်သာ နောက်ပိုင်မှာ ပြန်လည်လွတ်မြောက်ခဲ့ပါတယ်။

လတ်တလော အဆိုပါလောင်းကစားရုံတွေကနေ ပြန်လွတ်မြောက်လာတဲ့ လူငယ်တွေဟာ ဆိုးရွားတဲ့ အခြေအနေတွေ ကြုံတွေ့ခဲ့ရသလို သူတို့အပေါ် အန္တရာယ် ကျရောက်လာမှာ စိုးရိမ်တဲ့အတွက် ဒီအကြောင်းတွေကို ပြောဆိုရာမှာ နာမည်ထုတ်ပြောဖို့ တွန့်ဆုတ်ကြသလို ရဲစခန်းကို တိုင်ကြားတာမျိုးလည်း မရှိကြသေးပါဘူး။

“သူတို့က လက်နက်ကိုင်တွေကို ငွေပေးထားပြီး လက်နက်နဲ့ မောက်မာနေကြတာ။ ဂိတ်မှာ စစ်တပ်ကြီးစောင့်နေတာ ကျနော်တို့က ဘယ်ကို သွားတိုင်ရဲမှာလဲ။ ပစ်လိုက်ရင် ဘယ်လိုလုပ်မှာလဲ။ သူတို့က အားလုံးပိုင်တယ်။ ငွေပေးပြီးသားလို့ လုံခြုံရေး တယောက်က ပြောလိုက်တယ်” လို့ အလုပ်လုပ်ပြီး ပြန်လာသူ တယောက်က ပြောပါတယ်။

ကျဉ်စက်တပ်ထားတဲ့ တုတ်တွေကို ကိုင်ဆောင်တတ်ကြတဲ့ လုံခြုံရေးဆိုသူတွေကလည်း သူဌေးဆိုသူတွေ သတ် ဆိုသတ်၊ ရိုက်ဆိုရိုက်လုပ်မယ်ဆိုတဲ့သူမျိုးတွေသာ အများစုဖြစ်တယ်လို့လည်း လုပ်ကိုင်ခဲ့သူတွေက ဆိုပါတယ်။

ဒီလို သူတို့အနေနဲ့ အန္တရာယ်ကို စိုးရိမ်ကြပေမယ့် လောင်းကစားရုံတွေမှာ ကျန်ရှိနေသေးတဲ့ လူငယ်တွေနဲ့ ထပ်ပြီး လာရောက်လုပ်ကိုင်ဖို့ ပြင်နေကြတဲ့ လူငယ်တွေကို သတိပေးလိုတဲ့အတွက် လူအများသိအောင် ပြောဖို့လိုတယ်လို့တော့ သူတို့ ယုံကြည်ထားပါတယ်။
“သူတို့က မြန်မာစကားတောင် မတတ်တာ ဘယ်လို ကိုယ်ချင်းစာစိတ်ရှိမှာလဲ။ ၁၆၊ ၁၇ အရွယ် လူငယ်တွေဆို ဒါကြီးကို မရုန်းထွက်နိုင်ရင် ဒီအလုပ်တွေက သူတို့စွဲပါသွားမှာ။ သူများချွေးနည်းစာကို လုယူနေတာ ဘယ်လို အဆင်ပြေမှာလဲ။ ဝဋ် ဆိုတာ နောင်ဘဝ မကူးဘူး” လို့ လျော်ကြေးပေးပြန်လာရတဲ့ လူငယ်တဦးက ပြောပါတယ်။

ကိုယ်တိုင်ကြုံခဲ့ရတဲ့ နော်အယ်စေး ကလည်း “ဝမ်းနည်းတာပေါ့။ ကိုယ့်နိုင်ငံမှာ တခြားသူက လာလိမ်တာကို ခံနေရတာ။ ကိုယ်ညံ့ တာလည်း ပါပါတယ်။ ကိုယ့်မြန်မာ အချင်းချင်းကကို သိသိကြီးနဲ့ ဒီလိုနေရာကို ခေါ်လာတာ။ ဒီအလုပ်တွေက မယုံရဘူး ဆိုတာကို နောက်လူတွေကို သိစေချင်တယ်” လို့ ပြောပါတယ်။

လက်ရှိမှာ ထွက်ပြေးလွတ်မြောက်လာတဲ့ ဝူချင်းဟုန် အပါအဝင် သူငယ်ချင်းတစုဟာ အိမ်ပြန်ရောက်ကြပြီ ဆိုပေမယ့် မပြန်နိုင်သေးဘဲ လောင်းကစားရုံတွေမှာ လိမ်လည်ရတဲ့ အလုပ်တွေ လုပ်ပေးနေရပြီး ပိတ်မိနေကြဆဲ လူငယ်တွေ အများ အပြား ကျန်နေသေးတာဖြစ်လို့ ကူညီပေးကြဖို့လည်း သူတို့က တိုက်တွန်း ပြောဆိုလိုက်ပါတယ်။။