တိုက်ပွဲဆက်ဖြစ်နေသော ဆီဆိုင်မြို့ကို လေတပ်က ဗုံးကြဲနေပြီး မြို့တွင်း ပိတ်မိနေသူ ၄၀ ခန့်ကို ကူညီရေးအဖွဲ့များက ကယ်ထုတ်
ဖေဖော်ဝါရီ ၁၂ ရက်နေ့က ရှမ်းပြည်နယ်တောင်ပိုင်း ဆီဆိုင်မြို့နယ်တွင် စစ်တပ်နှင့် တိုက်ပွဲဖြစ်ပွားခဲ့ပြီး ဒေသတွင်း စစ်ရေး ဆက်လက်ပြင်းထန်နေဆဲဖြစ်ကြောင်း ပအိုဝ်းအမျိုးသားလွတ်မြောက်ရေးတပ်မတော် (PNLA) ၏ ထုတ်ပြန်ချက်များနှင့် ဒေသခံတို့၏အဆိုအရ သိရသည်။
ထိုနေ့နံနက်က ကင်းလှည့်နေသော PNLA စစ်ကြောင်းကို စနိုက်ပါ၊ ဒရုန်း၊ လက်နက်ကြီး၊ လက်နက်ငယ်များဖြင့် စောင့်ဆိုင်း ပစ်ခတ်ရာမှ တိုက်ပွဲဖြစ်ပွားခဲ့ကြောင်း စစ်ကောင်စီဘက်မှ ၈ ဦးထက်မနည်း သေဆုံးပြီး သေနတ် ၂ လက်၊ ကား ၁ စီး၊ ခဲယမ်း ကျည်ဆန်တချို့ကို သိမ်းဆည်းရမိခဲ့ကြောင်း PNLA က နောက်တစ်နေ့တွင် သတင်းထုတ်ပြန်သည်။
စစ်ကောင်စီတပ် ဆုတ်ခွာရာလမ်းတစ်လျှောက်ရှိ ပအိုဝ်းကျေးရွာများကို လက်နက်ကြီးများဖြင့် ရမ်းသန်းပစ်ခတ်ခြင်းကြောင့်လည်း ဒေသခံတို့ ထွက်ပြေးတိမ်းရှောင်ခဲ့ရကြောင်း သိရသည်။
ဆီဆိုင်မြို့တိုက်ပွဲများအတွင်း စစ်ကောင်စီတပ်ဘက်တွင် အင်အားအများစုမှာ ဒေသခံ ပအိုဝ်းပြည်သူ့စစ် (PNO) တပ်ဖွဲ့ဝင်များဖြစ်သည်။
ဆီဆိုင်မြို့သည် ရှမ်းပြည်နယ်မြို့တော် တောင်ကြီးနှင့် ကရင်နီပြည်နယ် (ကယားပြည်နယ်) ကြားတွင် တည်ရှိသည်။
မြို့အဝင်ရှိ စစ်ကောင်စီ၏ အမှတ် ၄၂၄ တပ်ရင်းစခန်းကို နှစ်ဖက် အပြန်အလှန် တိုက်ခိုက်ရယူထားရာမှ ဖေဖော်ဝါရီ ၁၂ ညနေပိုင်းတွင်မူ တော်လှန်ရေးအင်အားစုက ပြန်သိမ်းယူခဲ့သည်ဟု အကူအညီပေးရေး ဝန်ထမ်းတစ်ဦးက ပြောသည်။
“တိုက်ပွဲဖြစ်တယ်ဗျ။ PDF တွေက ၄၂၄ ကို ပြန်သိမ်းလိုက်ပြီ။ တစ်ညလုံး တိုက်ပွဲဖြစ်တယ်။ လေယာဉ်နဲ့လည်း ကြဲတယ်။ (မနက်) ၃၊ ၄ နာရီအထိ ဗုံးကြဲတယ်” ဟု စစ်ရှောင်များကို ကူညီနေသည့် မေတ္တာရောင် ပြန်သွေးအလှူရှင်အသင်းမှ အမျိုးသားတစ်ဦးက ပြောသည်။
“တပ်မတော်ဘက်ကလည်း အကျအရှုံးများတယ်။ ညနေဘက်မှာ ဆိုက်ခေါင်ကနေ လူအင်အား (လက်နက်ကိုင်စစ်သည်အင်အား) ရာနဲ့ချီ သွားပြီးတော့ တိုက်နေတယ်ဗျ”
ဆိုက်ခေါင်သည် ဆီဆိုင်မြို့မှ ၁၂ မိုင်ခန့်အကွာတွင် တည်ရှိပြီး ထိုနေရာမှ ဆက်သွားလျှင် ဟိုပုန်း၊ တောင်ကြီးတို့ကို ရောက်မည် ဖြစ်သည်။
တပ်ရင်း ၄၂၄ အခြေအနေနှင့် ပတ်သက်ပြီး တော်လှန်ရေးအဖွဲ့များဘက်က အတည်မပြုသေးပေ။
ဆီဆိုင်မြို့ပေါ်ရပ်ကွက်များတွင် ကျန်နေရစ်သော ဒေသခံ ၄၀ ခန့်ကို တိမ်းရှောင်ရန် ယမန်နေ့ မွန်းလွဲက ဝင်ရောက် ခေါ်ယူခဲ့သည်၊ ထိုအထဲတွင် သက်ကြီးရွယ်အို၊ မသန်စွမ်းသူများနှင့် ကလေးများ ပါဝင်သည်ဟု ၎င်းက ဆိုသည်။
“အခုတော့ ဆီဆိုင်မြို့ပေါ်မှာ လက်ကျန်လူတွေလို့ ပြောလို့ရတဲ့ လူ ၄၀ လောက်တော့ လောလောဆယ် ထွက်လာပြီ” ဟု ထိုသူက ဆက်ပြောသည်။
“ဆီဆိုင်မြို့ထဲကတော့ တပ်မတော်ဘက်က ပစ်တဲ့ လက်နက်ကြီးသံတွေ (မြို့ခံ) တော်တော်များများများက လုံးလုံး မနေရဲတော့ဘူး”
စစ်ကောင်စီက အခြားတိုက်ပွဲများနည်းတူ ဆီဆိုင်မြို့ တိုက်ပွဲများနှင့် ပတ်သက်ပြီး သတင်းထုတ်ပြန်ခြင်း မရှိပေ။
ဆီဆိုင်မြို့နယ်အတွင်း PNLA လှုပ်ရှားသော ကျေးရွာ ရပ်ကွက်များ စစ်ရေးပစ်မှတ်ဖြစ်လာရာ ဖေဖော်ဝါရီ ၁၀ တွင် ဆီဆိုင်မြို့အနောက်ဘက်တွင် ပေါင် ၅၀၀ ဗုံး ကြဲချခံရသည်၊ နောက်တစ်နေ့ နံနက် ၈ နာရီခန့်တွင် ဆီဆိုင်မြို့ ဘုရားဖြူ အထက်တန်းကျောင်းအရှေ့ဘက်ရှိ အောင်ချမ်းသာရပ်ကွက်အတွင်း လက်နက်ကြီးကျည် ကျရောက်ပေါက်ကွဲပြီး ဆိုင်ခန်းတစ်ခန်း ပျက်စီးခဲ့သည်။
နေ့စဉ်နီးပါး တိုက်ပွဲပြင်းထန်နေသည်၊ ပစ်ခတ်ခံရသဖြင့် ဘာသာရေးအဆောက်အအုံ ၇ ခုထက်မနည်းနှင့် နေအိမ် ၅၀ နီးပါး ထိခိုက်ပျက်စီးခဲ့ရသည်ဟု PNLA က ထုတ်ပြန်သည်။
လတ်တလောတွင် စစ်ရေးပြင်းထန်နေသဖြင့် ဆိုက်ခေါင်မှ ဆီဆိုင်သို့ ဆက်သွယ်ထားသော ပြည်ထောင်စုလမ်းမကြီး၊ ကျေးရွာလမ်းငယ်များ၊ တောလမ်းများတွင် သွားလာခွင့် ယာယီပိတ်ထားကြောင်း PNLA က ဖေဖော်ဝါရီ ၁၀ ရက်နေ့တွင် စာထုတ်ထားသည်။
ဖေဖော်ဝါရီ ၁၄ နံနက် ၁၀ နာရီကျော်ခန့်တွင်လည်း ဟိုပုံးနှင့် ဆီဆိုင်ကြား ပဆျားကြိုးရွာကို လေကြောင်းမှ ဗုံးကြဲခဲ့သဖြင့် ရွာသား ၂ ဦး သေဆုံးပြီး၊ ၄ ဦး ဒဏ်ရာရရှိခဲ့ကြောင်း ဒေသတွင်းသတင်းများတွင် ဖော်ပြထားကြသည်။
NCA ထိုးထားသော PNLA တော်လှန်ရေးတွင် ပါဝင်လာ
ဆီဆိုင်သည် ဟိုပုန်း၊ ပင်လောင်းမြို့တို့နှင့်အတူ ပအိုဝ်းကိုယ်ပိုင်အုပ်ချုပ်ခွင့်ရဒေသထဲတွင် ပါဝင်သည်။
အင်အားကြီး တိုင်းရင်းသားအဖွဲ့ပေါင်းစုံ အခြေစိုက်သော ရှမ်းပြည်နယ်အတွင်းမှ လက်နက်ခဲယမ်းများ ကရင်နီပြည်နယ် (ကယားပြည်နယ်) သို့ ဖြတ်သန်းသယ်ဆောင်ရာတွင် ထိုဒေသသည် အဓိကလမ်းကြောင်းကြီး ဖြစ်သလို လက်နက်အများအပြား ဖမ်းဆီးရမိသည့် ဒေသလည်း ဖြစ်သည်။
ဇန်နဝါရီ ၂၀ ရက်နေ့က ရှမ်းပြည်နယ် ဟိုပုံးမြို့၊ စံဖူးရွာအနီးတွင် လက်နက်သယ်ယာဉ်တန်းတစ်ခု ဟန့်တားခံရသောအခါ PNLA က ၎င်းတို့ သယ်ဆောင်လာသည့် ရာနှင့်ချီသော လက်နက်များကို လမ်းပေါ်တွင်ပင် မီးရှို့ဖျက်ဆီးလိုက်သည်။
ဇန်နဝါရီ ၂၅ တွင် PNLA ပါဝင်သော
တော်လှန်ရေးပူးပေါင်းတပ်က ဆီဆိုင်မြို့နယ်အတွင်း ဝင်ရောက်တိုက်ခိုက်ရာမှ
တိုက်ပွဲများ စတင်ဖြစ်ပွားခဲ့သည်။
နောက်တစ်နေ့တွင် မြို့ကို
ထိန်းချုပ်ထားနိုင်ခဲ့ပြီး ရဲစခန်း၊ မြန်မာ့စီးပွားရေးဘဏ်နှင့်
ဌာနဆိုင်ရာရုံးများတွင် PNLA အလံများ လွှင့်ထူလိုက်သည်။
ထို့နောက် လေတပ်က ဆီဆိုင်မြို့နှင့်အနီးတစ်ဝိုက် လေကြောင်းတိုက်ခိုက်မှုများ အကြိမ် ၂၀ ထက်မနည်း ဆက်တိုက် ပြုလုပ်ခဲ့ရာ မြို့ပေါ်တွင် နေရာယူထားသော တပ်ပေါင်းစုက ဇန်နဝါရီ ၂၇ တွင် ပြန်လည်ဆုတ်ခွာသွားသည်။
စစ်ကောင်စီက မြို့အဝင်တွင် တစ်ဆက်တည်းရှိသည့် ခလရ ၄၂၃၊ ၄၂၄ တပ်ရင်းနှစ်ခုနှင့် မြို့မရဲစခန်းရှိသောနေရာကို ပြန်လည်ထိန်းချုပ်နိုင်ခဲ့သော်လည်း မြို့ဝန်းကျင်နှင့် မြို့တွင်းရပ်ကွက်များကို ကရင်နီ၊ PDF, PNLA တပ်ပေါင်းစုက ထိန်းချုပ်ထားသည်။
“အရိုးသားဆုံးပြောမယ်ဆိုရင်တော့ ဆီဆိုင် ၄၂၃ က လွဲရင် PDF တွေ ဝိုင်းထားပြီးသားပါပဲ။ လက်ရှိအနေအထားကတော့လေ။ အရင်ကတည်းက တစ်မြို့လုံးမှာ PDF က ဝိုင်းထားပြီးသားပါ ။ (PDF) ရှိနေလို့ (စစ်တပ်က) လက်နက်ကြီးက အဆက်မပြတ်ပစ်လို့ ဆီဆိုင်မြို့က ၄၀ ရာခိုင်နှုန်းလောက် ပျက်စီးနေပြီ” ဟု အထက်ပါ ဒေသခံအမျိုးသားက ပြောသည်။
ကရင်နီအခြေစိုက် ကရင်နီအမျိုးသားများကာကွယ်ရေးတပ် (KNDF) ၊ PNLA, PDF အပါအဝင် အဖွဲ့ ၄ ဖွဲ့က ပူးပေါင်း တိုက်ခိုက်နေသည်ဟု ဆိုသည်။
“PDF
ပါမယ်။ KNDF ပါမယ်။ အဖွဲ့ ၄ ဖွဲ့ပေါင်းပြီးတိုက်နေတာဗျ။ ပအိုဝ်းကတော့
လောလောဆယ် ပွဲကခြင်းကို ပအိုဝ်း အချင်းချင်း ရှောင်ပြီး ဖြစ်နေတယ်။ အခု
ဖြစ်နေတာကတော့ ဆီဆိုင်မှာတော့ PDF က ကြီးစိုးပြီး တိုက်နေတာပေါ့” ဟု ၎င်းက
ပြောသည်။
PNO ခေါ် ပအိုဝ်းပြည်သူ့စစ်သည် အစဉ်အဆက် စစ်ခေါင်းဆောင်များ၏ မဟာမိတ်ဖြစ်ပြီး ပအိုဝ်းကိုယ်ပိုင်အုပ်ချုပ်ခွင့်ရဒေသကို စိုးမိုးထားကာ ယခုတိုက်ပွဲတွင်လည်း စစ်တပ်၏ အားကိုးရသည့်အဖွဲ့ ဖြစ်လာသည်။ လက်နက်ကိုင်အင်အား ၃၀၀၀ အထိပင် ရှိနိုင်သည်ဟု သတင်းထွက်နေသည်။
ယခု စစ်ကောင်စီတပ်ကို တိုက်နေသည့် PNLA မှာ လက်နက်ကိုင်အင်အား ၄၀၀ နှင့်အထက် ရှိမည်ဟု အကဲခတ်တို့ ယူဆထားကြသည်။
PNLA က ပအိုဝ်းအမျိုးသားချင်းချင်း တိုက်ခိုက်လိုခြင်း မရှိသဖြင့် ပြည်သူ့စစ်တပ်ဖွဲ့ဝင်များ စစ်ကောင်စီကို စွန့်ခွာကြရန် တိုက်တွန်းလျက်ရှိသည်။
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး စာချုပ် (NCA) တွင် လက်မှတ်ထိုးထားသော PNLA ၏ ထိပ်ပိုင်းခေါင်းဆောင်များသည် အာဏာသိမ်းစစ်တပ်၏ “ငြိမ်းချမ်းရေး” ဆွေးနွေးပွဲတိုင်းတွင် ပူးပေါင်းဆောင်ရွက်နေသည်။
လတ်တလောတွင် ဆီဆိုင်ဒေသခံများမှာ တောင်ကြီး၊ ဆိုက်ခေါင်နှင့် အနီးဝန်းကျင်သို့ တိမ်းရှောင်နေကြရပြီး အခက်အခဲများ ဖြစ်ပေါ်နေသည်ဟု ဆိုသည်။
ဆီဆိုင်မြို့မှ ၁၂ မိုင်ခန့်အကွာ ဆိုက်ခေါင်မြို့တွင် စစ်အင်အား ၇၀၀ ခန့်ဖြင့် အမြောက်တပ် ၄ ခု အခိုင်အမာချကာ စစ်ပြင်ထားကြောင်း ဒေသခံများထံမှ သိရသည်။