၁၀၂၇ စစ်ဆင်ရေး ကနေ အမြတ်ထွက်သွားတဲ့ ‘‘ဝ’’တပ်ဖွဲ့

 

 ၁၀၂၇ စစ်ဆင်ရေးမှာဝင်မပါဘူးလို့ ပြောထားတဲ့ ''ဝ''တပ်ဖွဲ့ UWSA ဟာ စစ်ကောင်စီလက်အောက်က မြို့နှစ်မြို့ကို သေနတ်တစ်ချက်မှမဖောက်ဘဲရလိုက်ပါတယ်။

''ဝ'' ကိုယ်ပိုင်အုပ်ချုပ်ခွင့်ရတိုင်းထဲက ဟိုပန်မြို့ နဲ့ ပန်လုံမြို့ကို ''ဝ''ပြည်သွေးစည်းညီညွတ်ရေးပါတီ UWSP/UWSA အုပ်ချုပ်မှုအောက် လွှဲပြောင်းပေးတဲ့ အခမ်းအနားကို ဇန်နဝါရီ ၁၀ ရက်က ဟိုပန်မြို့တော်ခန်းမမှာ ပြုလုပ်ခဲ့တာဖြစ်ပါတယ်။

စစ်ကောင်စီကခန့်ထားတဲ့''ဝ''တိုင်း ဥက္ကဋ္ဌ ဦးညီနပ်က UWSA ရဲ့ မိုင်းမောခရိုင်မှူး ဦးဆိုင်ပေါင်းကို မြို့အုပ်ချုပ်မှုကို လွှဲပေးခဲ့ပြီး ဒါကစစ်ကောင်စီရဲ့ သဘောတူညီမှုနဲ့ လွှဲတာလားဆိုတာကိုတော့ရှင်းရှင်းလင်းလင်းမသိရပါဘူး။

ဇန်နဝါရီလ ၅ ရက်မှာ မြောက်ပိုင်းမဟာမိတ်တပ်တွေ ဟိုပန်ကို ဝင်လာခဲ့ပြီး မြန်မာစစ်တပ်က အင်အား ခုနှစ်ရာကျော်လက်နက်ချ ဆုတ်ခွာခဲ့ပြီးတဲ့နောက် မြို့ကို မဟာမိတ်တွေ အုပ်ချုပ်မှာလား၊ ''ဝ''တပ်ဖွဲ့က အုပ်ချုပ်မှာလားဆိုတဲ့ မေးခွန်းတွေအတွက် အဖြေထွက်ခဲ့တာလည်း ဖြစ်ပါတယ်။          

အထူးဒေသ ( ၂) နဲ့ ''ဝ''တိုင်း ပေါင်းစည်းမိခြင်း

၁၉၈၉ ခုနှစ်မှာ ဗမာပြည်ကွန်မြူနစ်ပါတီကို ပုန်ကန်ပြီး ပေါ်ပေါက်လာတဲ့ကိုးကန့်တပ် ၊''ဝ'' တပ်တို့ နဲ့ ဗိုလ်ချုပ်ခင်ညွန့် က ငြိမ်းချမ်းရေးယူခဲ့ပြီး ကိုးကန့်ဒေသကို အထူးဒေသ(၁) နဲ့ '' ဝ '' ဒေသကိုအထူးဒေသ(၂) အဖြစ် သတ်မှတ် သတ်မှတ်ပေးခဲ့ပါတယ်။

 ဒါပေမဲ့ အထူးဒေသ(၂) ထဲမှာ ဟိုပန်မြို့နယ်ကတော့ မပါသွားခဲ့ဘဲ မြန်မာစစ်တပ်ကပဲ ဆက်လက်ထိန်းချုပ်ထားခဲ့ပါတယ်။

ဟိုပန်မြို့နယ်ထဲက နမ့်တစ် မြို့ကိုတော့ အထူးဒေသ(၂) ထဲ ထည့်ပေးလိုက်ရပြီးကနဦးမှာ မြန်မာအစိုးရရဲ့ ဌာနဆိုင်ရာရုံးတချို့ကို အခြေစိုက်ခွင့်ပြုခဲ့ပေမဲ့ ဗိုလ်ချုပ်ကြီးခင်ညွန့်ထိန်းသိမ်းခံရပြီးနောက်ပိုင်းမှာတော့ အစိုးရရုံးတွေကို နမ့်တစ်ထဲက ထွက်ခွာစေခဲ့ပါတယ်။

အထူးဒေသ(၂) ထဲက နမ့်တစ်ကို ထိန်းချုပ်မရတဲ့မြန်မာအစိုးရဟာ ပန်လုံကိုမြို့အဆင့်ဖွဲ့စည်းခဲ့တာတွေ့ရပါတယ်။

၂၀၀၈ ဖွဲ့စည်းပုံအခြေခံဥပဒေ ကို ရေးဆွဲတဲ့အခါမှာ ဟိုပန်မြို့နယ်၊မက်မန်းမြို့နယ်၊ပန်ဆန်းမြို့နယ်၊မိုင်းမောမြို့နယ်၊ပန်ဝိုင်မြို့နယ် နဲ့ နားဖန်းမြို့နယ် တို့ကို''ဝ''ကိုယ်ပိုင်အုပ်ချုပ်ခွင့်ရတိုင်း အဖြစ်ဖွဲ့စည်းပေးခဲ့ပါတယ်။

မြေပြင်မှာတော့ ဟိုပန်မြို့နယ် နဲ့ မက်မန်းမြို့နယ် နှစ်ခုမှာပဲ မြန်မာအစိုးရက ဌာနဆိုင်ရာ ရုံးတွေ နဲ့ တပ်စွဲခွင့်ရခဲ့ပြီး ကျန်တဲ့ မြို့နယ် လေးခုကတော့''ဝ''ပြည်သွေးစည်းညီညွတ်ရေးပါတီ ရဲ့ ထိန်းချုပ်မှုအောက်မှာ ရှိနေခဲ့ပါတယ်။

၁၀၂၇ စစ်ဆင်ရေး ပေါ်ပေါက်ပြီးတဲ့နောက် ဟိုပန်နဲ့ ပန်လုံမြို့တွေ''ဝ''ပြည်သွေးစည်းညီညွတ်ရေးပါတီ လက်အောက်ရောက်သွားလို့ အထူးဒေသ(၂) ရဲ့ ထိန်းချုပ်နယ်မြေက ပိုမိုကျယ်ဝန်းသွားခဲ့ပြီ ဖြစ်ပါတယ်။

UWSA ရဲ့ ဌာနချုပ်ဟာ ပန်ဆန်းဖြစ်ပေမယ့် ဟိုပန်ကိုတော့ မိုင်းမောခရိုင်ကတဆင့် အုပ်ချုပ်မယ်လို့ သိရတဲ့အကြောင်း ဇန်နဝါရီ ၁၀ ရက်အခမ်းအနားကို သွားရောက်ခဲ့သူတွေထံက ဘီဘီစီက စုံစမ်းသိရှိရပါတယ်။

မြန်မာနိုင်ငံအလံနဲ့ UWSA အလံ ယှဉ်တွဲထားတဲ့ အဲဒီအခမ်းအနားမှာ UWSA ရဲ့ အုပ်ချုပ်ရေးလုပ်ငန်းစဉ်တွေအကြောင်း''ဝ''ဘာသာ နဲ့ ပြောပြတာကို မြန်မာဘာသာ ပြန်ဆိုပေးနေတဲ့ ရုပ်သံဖိုင်ကိုလည်း''ဝ''တပ်ဖွဲ့ရဲ့ ပြောရေဆိုခွင့်ရှိသူ ဦးညီရန်းက သူ့ရဲ့လူမှုကွန်ရက်မှာ တင်ခဲ့ပါတယ်။

''ဝ''ပြည်နယ် အိပ်မက်နီးသထက်နီးပြီလား

''ဝ''ပြည်သွေးစည်းညီညွတ်ရေးတပ်မတော် UWSA ဟာ မြန်မာနိုင်ငံက တိုင်းရင်းသားလက်နက်ကိုင်အဖွဲ့တွေထဲ အင်အားအကြီးဆုံးဖြစ်ပါတယ်။

ငြိမ်းချမ်းရေးယူပြီး နှစ်ပေါင်း ၃၀ ကျော်အတွင်း UWSA ဟာ တပ်အင်အားကို အကောင်းဆုံး တည်ဆောက်ခဲ့တာတွေ့ရပါတယ်။

''ဝ''ဒေသဟာ နေပြည်တော်ရဲ့ အုပ်ချုပ်မှုအောက်က လွတ်ကင်းနေပြီး ကိုယ်ပိုင်တပ်၊ ကိုယ်ပိုင်အုပ်ချုပ်ရေး နဲ့ ကိုယ်ပိုင် ဘဏ္ဍာငွေ နဲ့ ရပ်တည်နေတာ တွေ့ရပါတယ်။

နေပြည်တော်က''ဝ''ဒေသ ကို အခြေခံဥပဒေမှာမပါတဲ့ အထူးဒေသ ဆိုတဲ့ စကားလုံးကို သုံးစွဲတာ တွေ့ရပြီး UWSA ကတော့''ဝ''ပြည်နယ်အစိုးရ လို့ သူတို့ကိုယ်သူတို့ သုံးနှုန်းပါတယ်။

ဒါပေမဲ့ ''ဝ''ခေါင်းဆောင်တွေ နဲ့ မြန်မာစစ်တပ်ခေါင်းဆောင်တွေကြား ရင်းနှီးတဲ့ဆက်ဆံရေးတွေရှိခဲ့ကြပါတယ်။

စစ်အစိုးရခေတ် အပစ်အခတ်ရပ်စဲရေး စာချုပ်ကို ၁၉၈၉ ခုနှစ်မှာ စတင်ချုပ်ဆိုခဲ့ပြီး ပြည်နယ်အဆင့် ငြိမ်းချမ်းရေးစာချုပ် နဲ့ ပြည်ထောင်စုအဆင့် ငြိမ်းချမ်းရေးစာချုပ် တွေကို ၂၀၁၁ ခုနှစ်အတွင်းမှာ ချုပ်ဆိုခဲ့ပါတယ်။

ဒါပေမဲ့ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) မှာတော့

''ဝ''တပ်ဖွဲ့က လက်မှတ်မထိုးထားပါဘူး။

အာဏာသိမ်းစစ်ကောင်စီလက်ထက်မှာတော့ ဗိုလ်ချုပ်မှူးကြီးမင်းအောင်လှိုင် ရဲ့ ငြိမ်းချမ်းရေးဖိတ်ခေါ်မှု ကို ''ဝ''တပ်ဖွဲ့က လက်ခံခဲ့ပြီး နေပြည်တော်ကို ကိုယ်စားလှယ်အဖွဲ့စေလွှတ်ခဲ့ပါတယ်။

စစ်ကောင်စီ နဲ့ ''ဝ''တပ်ဖွဲ့ကြား''ဝ''ပြည်နယ် အဆင့် သတ်မှတ်ပေးဖို့ မူအားဖြင့် သဘောတူညီမှုရထားပြီးလည်း ဖြစ်ပါတယ်။

စစ်တပ် နဲ့ ဆွေးနွေးနေတဲ့ ''ဝ''တပ်ဖွဲ့ဟာ တစ်ဘက်မှာလည်း စစ်တပ် နဲ့တိုက်ခိုက်နေတဲ့ တိုင်းရင်းသားလက်နက်ကိုင်တွေ နဲ့ မဟာမိတ် ဖြစ်နေပြန်ပါတယ်။

UWSP ဟာ ပြည်ထောင်စုနိုင်ငံရေးဆွေးနွေးရေးကော်မတီ(Federal Political Negotiation and Consultative Committee – FPNCC) ရဲ့ ဥက္ကဋ္ဌ ဖြစ်ပါတယ်။

FPNCC ကို တိုင်းရင်းသားလက်နက်ကိုင် ၇ ဖွဲ့ဖြစ်တဲ့''ဝ''တပ်ဖွဲ့ UWSA ၊ ကချင်တပ်ဖွဲ့ KIA၊ ရှမ်းပြည်တိုးတက်ရေးပါတီ SSPP ၊ မိုင်းလားအဖွဲ့ NDAA၊ ကိုးကန့်အဖွဲ့ MNDAA၊ ရက္ခိုင့်တပ်တော် AA ၊ ပလောင်တပ် TNLA တို့နဲ့ ဖွဲ့စည်းထားတာဖြစ်ပါတယ်။

 

၁၀၂၇ စစ်ဆင်ရေး နဲ့''ဝ''တပ်ဖွဲ့

၁၀၂၇ စစ်ဆင်ရေး ပထမဆုံးရက်မှာပဲ ဟိုပန်မြို့ နဲ့ ချင်းရွှေဟော် (ဖောင်ဆိပ်) ကို ဆက်သွယ်ထားတဲ့ နမ့်တိမ်တံတား မိုင်းခွဲ ဖျက်ဆီး ခံရပါတယ်။

အောက်တိုဘာ ၂၇ ရက်မှာစတင်တဲ့ တိုက်ပွဲတွေကို အင်အားသုံး မဖြေရှင်းကြဘဲ ထိန်းထိန်းသိမ်းသိမ်းဆောင်ရွက်ကြဖို့နဲ့ အပစ်ခတ်ရပ်စဲရေးလုပ်ဖို့ UWSA က နိုဝင်ဘာ ၁ ရက်မှာ တိုက်တွန်းခဲ့ပါတယ်။

“၀” ဒေသရဲ့ လေပိုင်နက်နဲ့ မြေပိုင်နက်ထဲကိုစစ်ရေးအရ ဝင်ရောက်တိုက်ခိုက်ကျူးကျော်ဝင်ရောက်မှုမှန်သမျှကို ပြတ်ပြတ်သားသား လက်တုံ့ပြန်မယ်လို့ တဆက်တည်း ကြေညာပါတယ်။

မြန်မာစစ်တပ်ရဲ့ စစ်ရေးအကြံပေးတချို့ကတော့ ချင်းရွှေဟော်မြို့ သိမ်းပိုက်ခံရမှုမှာ မြောက်ပိုင်းမဟာမိတ်တပ်ဖွဲ့တွေဟာ UWSA ထိန်းချုပ်နယ်မြေ နမ့်တစ်မြို့ရဲ့ အစိတ်အပိုင်းကို အသုံးပြုခဲ့ကြတယ်လို့ စွပ်စွဲထားပါတယ်။

ဝ တပ်ဖွဲ့ကတော့ ကြားနေရေးမူကိုပဲ ကျင့်သုံးခဲ့ပြီး ကိုးကန့်ဒေသက စစ်ရှောင်သောင်းချီအတွက် နမ့်တစ်မြို့ကို ဖြတ်သန်းခွင့်ပြုခဲ့ပါတယ်။

ကိုးကန့်ဒေသ တစ်ခုလုံးကို သိမ်းပိုက်ပြီးနောက် ဇန်နဝါရီလ ၅ ရက် မှာ MNDAA က ဟိုပန်မြို့ ကို စစ်မျက်နှာပြင်ဖွင့်ခဲ့ပါတယ်။

တိုက်ပွဲက နာရီပိုင်းလောက်ပဲ ကြာခဲ့ပြီး ညှိနှိုင်းမှုတွေလုပ်ပြီးတဲ့နောက် စစ်ကောင်စီတပ်တွေ ဟိုပန်ကနေ ထွက်ခွာခဲ့ပါတယ်။

ကနဦးမှာ ဝ တပ်ဖွဲ့ နဲ့ မဟာမိတ်တပ်တွေကြားမှာ နယ်မြေအငြင်းပွားမှုတွေဖြစ်မလားလို့ စောင့်ကြည့်ခဲ့ကြပေမဲ့ ဇန်နဝါရီ ၁၀ ရက် အခမ်းအနားနဲ့ လွှဲပြောင်းမှုအရ ဟိုပန်မြို့နယ်ဟာ UWSA ထိန်းချုပ်မှုအောက်ကို ရောက်ရှိခဲ့ပြီ ဖြစ်ပါတယ်။

အရင်က နမ့်တစ်မြို့ ပိုင်နက်ထဲကနေ မြန်မာစစ်တပ်စခန်းတွေ နဲ့ တပ်ဆိုင်ထားတဲ့ UWSA ဟာ ၃၄ နှစ်အတွင်းပထမဆုံးအကြိမ် ဟိုပန်မြို့ထဲကို တပ်ဖြန့် ဝင်ရောက်လာနိုင်ခဲ့ပြီ ဖြစ်ပါတယ်။

‘’တစ်မြို့လုံးမှာ ဝ တပ်ဖွဲ့ တွေ ဖြန့်ထားတယ်။ ထွက်မပြေးစရာမလိုဘူး။ အေးအေးဆေးဆေး နေလို့ ရတယ် လို့ပြောပါတယ်’’ လို့ မြို့ခံတွေက ပြောပါတယ်။