နေဝင်ချိန် မှတ်တမ်း (၇)
================
ဦးနေဝင်း တယောက် ရန်ကုန်ကနေ အာဏာဗဟိုဒေသ ရွှေ့ပြောင်းချင်တဲ့ အခြားအကြောင်းကတော့
- နိုင်ငံခြားသံရုံးတွေ ရုံးစိုက်ရာ အရပ်ဖြစ်လို့ ရန်ကုန်သတင်းအား ဖုံးဖိထားဖို့ မလွယ်ပဲ ကမ္ဘာသို့ ချက်ခြင်း ပျံ့နှံ့နိုင်ခြင်း
(ထိုအချိန်က it နည်းပညာ မထွန်းကားသေးလို့ အစိုးရက သတင်းထိမ်းနိုင်သေးတယ်)
-ရေတပ်အားနည်းနေသေးလို့ ပင်လယ်ပြင်ကလာမယ့် စစ်ရေးအန္တရာယ် ကို ကာကွယ်လိုခြင်း တို့ကြောင့် ဖြစ်ပါတယ် ။
ဦးနေဝင်းဟာ နယ်စပ်ဒေသမျာကိုလည်း ကြိုတင်ကာကွယ် ပြင်ဆင်မှုများ ပြုလုပ်ခဲ့ပါတယ် ။
ဘင်္ဂလားနယ်စပ်ရှိ ကျည်းကန်ပြင် လို ရွာများ ၊ အိန္ဒိယနယ်စပ် ကဘော်ချိုင့်ဝှမ်းရှိ မြို့သစ် ပလနစခမ်း နဲ့ ဗန္ဓုလရွာ အစရှိတဲ့ ရွာသစ်များ ထူထောင်ပြီး နယ်စပ်ဒေသများမှာ လူသားတံတိုင်းဖြင့် ကာရံမည့် အစီအမံများ ချမှတ်ပေးခဲ့ပါတယ် ။
အဲဒီ အစီအမံများဟာ ဦးနေဝင်းရဲ့ မူပိုင်အစီအမံတွေတော့ မဟုတ်ပါဘူး ။ သူ့ကိုတင်ပြခဲ့သူကတော့ စစ်ဘက်လက်ထောက် ရာထူး (Aide-de-Camp) ယူထားတဲ့ ဗိုလ်မှူးချုပ်တင်ဦး(မျက်မှန်ကြီး) ဖြစ်ပါတယ် ။
"နိုင်ငံကာကွယ်ရေး မဟာဗျူဟာ လွှမ်းခြုံစနစ်" ဆိုတဲ့ အမည်နဲ့ စီမံကိန်း အရ ဖြစ်ပါတယ် ။
ဩဇာကြီးလှတဲ့ ဦးတင်ဦး(မျက်မှန်ကြီး) ရဲ့ ဘဝကလည်း ငယ်စဉ်ကတည်းက ဦးနေဝင်း နဲ့ ဆက်စပ်နေပြန်ပါတယ် ။ ဦးတင်ဦး(မျက်မှန်ကြီး) ရဲ့ မိဘ နှစ်ပါးဟာ မွန်လူမျိုး နိုင်ငံရေးသမား သခင် တွေ ဖြစ်ပါတယ် ။ ညီအကို လေးယောက်အနက် သူက တတိယမြောက်သား ဖြစ်ပါတယ် ။
၁၉၄၃ မှာ ဦးနေဝင်း မုဒုံသို့ ရောက်လာစဉ် (မူလ ပို့စ် မှာ စစ်ကြောင်းနဲ့လို့ ရေးထားပေမယ့် ထိုကာလတုန်းက ဦးနေဝင်းဟာ မြေအောက်တော်လှန်ရေး လုပ်ရန် ရှေ့ပြေး ၇ ဦးထဲမှာ ဦးဆောင်ပြီး အစောကြီး ကြိုရောက်နေလို့ ဦးနေဝင်း နဲ့ စစ်ကြောင်း မသက်ဆိုင်ဘူးလို့ ယူဆပါတယ်) မိဘများက ညီအကို ၄ ဦးလုံးအား စောင့်ရှောက်ပေးပါရန် ဦနေဝင်းထံ အပ်နှံခဲ့ပါတယ် ။
ဦးတင်ဦးဟာ အသက် ၁၅ နှစ်သားပဲ ရှိသေးပေမယ့် ၁၈ နှစ်ပါဆိုပြီး လိမ်ပြောကာ စစ်ထဲ အမှုထမ်းခဲ့ပါတယ် ။ အောက်ဆုံးက ညီအငယ်ဆုံးကလည်း နောင်တချိန်မှာ စစ်ထဲဝင်ခဲ့လို့ ညီအကို လေးယောက်လုံး စစ်သားတွေချည်း ဖြစ်ပါတယ် ။
သူ့အကို အကြီးဆုံးဖြစ်သူဟာ ဗိုလ်အဆင့်မှာ တိုက်ပွဲကျခဲ့ပါတယ် ။ ဒုတိယ အကိုလည်း ကျောက်ဆည် နယ်ထဲမှာ စစ်ဆင်ရေးလုပ်နေရင်း ငှက်ဖျားမိပြီး ကျဆုံးခဲ့ပါတယ် ။ ၁၉၄၅ တော်လှန်ရေးပြီးတော့ ဦးတင်ဦးဟာ တပ်စုမှူး ဖြစ်နေပါပြီ ။
ဒုတိယကမ္ဘာစစ်ကြီးပြီးတော့ ဦးတင်ဦးကို ဦးနေဝင်းက ရန်ကုန်တက္ကသိုလ် သို့ ဆက်လက်တက်စေခဲ့ပါတယ် ။ သူ ၁၅ နှစ်အရွယ်တုန်းက ၁၀ တန်းကျောင်းသား ဖြစ်လို့ ရန်ကုန်တက္ကသိုလ်မှာ သမိုင်း နဲ့ စီးပွားရေး ပညာ ဘာသာရပ်များ သင်ကြားခွင့် ရခဲ့ပါတယ် ။
ကျောင်းသားဘဝမှာ အပေါင်းအသင်း များစွာရှိသည့် အနက် အထူးခင်ရတဲ့ သူငယ်ချင်ချင်းကတော့ ဦးအေးချမ်း ဖြစ်ပါတယ် ။
ဦးအေးချမ်းဆိုတာ အခြားလူ မဟုတ်ပါဘူး ရဲဘော်ရေချမ်း စာရေးဆရာကလောင်အမည် မောင်စူးစမ်း NLD CEC ဗကပ အရင့်အမာ ကြီးပဲ ဖြစ်ပါတယ် ။
ဦးတင်ဦး(မျက်မှန်ကြီး)တို့ ကျောင်းပြီးတော့ ဦးအေးချမ်းက သူငယ်ချင်းကို ဗမာပြည်ကွန်မြူနစ်ပါတီသို့ ဝင်ရန် ဆွယ်တရား ဟောခဲ့ပေမယ့် ဦးတင်ဦးကတော့ လက်မခံပဲ ဦးနေဝင်းရှိရာ တပ်မတော်ဆီကိုပဲ ပြန်လာခဲ့ပါတယ် ။
ဒီအချိန်မှာ စိတ်မကောင်းစရာ ရှိတာက သူ့ရဲ့ ညီအငယ်ဆုံး တပ်ကြပ်ပြီး မျိုးသွယ်တယောက် မြစ်ဝကျွန်းပေါ် မှာ KNDO စစ်ဆင်ရေး ဆင်နွဲရင်း ကျဆုံးခဲ့ရရှာပါတယ် ။
ညီအကို ၄ ယောက်အနက် ၃ ဦးဟာ တိုင်းပြည်အတွက် အသက်ပေးသွားရပြီမို့ ဦးနေဝင်းဟာ နောက်ဆုံးမျိုးဆက်ကျန်နေသူ ဦးတင်ဦး(မျက်မှန်ကြီး)ကို ရှေ့တန်းစစ်မျက်နှာများဆီသို့ မပို့တော့ပဲ သူ့နားမှာ ခေါ်ထားပါတယ် ။
ထို့နောက် ပစိဖိတ်ဒေသရှိ ဆိုက်ပန်ကျွန်း မှာ CIA ထောက်လှမ်းရေးသင်တန်း တက်ရောက်စေခြင်း နဲ့ တဆက်တည်းမှာပဲ ဗြိတိန် တော်ဝင် ကြည်းတပ်ရဲ့ထောက်လှမ်းရေး သင်တန်းပါ ဆက်လက် တက်ရောက် သင်ကြားစေခဲ့ပါတယ် ။
ငယ်ရွယ် နုပျိုပြီး ဉာဏ်ထက်တဲ့ ပညာတတ် ဦးတင်ဦးကို သူ့နေရာနဲ့သူ အံဝင်ဂွင်ကျ အသုံးချသွားခြင်းဟာ ဦးနေဝင်းရဲ့ မြင်းသမား (လောင်းကစားသမား) ဗီဇ အရ ကွက်ကျော်မြင်တတ်ခြင်းသာ မကပါဘူး မိဘများကိုယ်တိုင် စောင့်ရှောက်ပေးဖို့ အပ်နှံထားခဲ့ခြင်း နဲ့ တိုင်းပြည်အတွက် အသက်စွန့်ခဲ့တဲ့ ညီအကို ၃ ဦးရဲ့ မျက်နှာကို ထောက်ထားကြည့်ရှု စောင်မတဲ့ သဘောလည်း ပါမယ်လို့ ရှုမြင်မိပါတယ် ။
အဲဒီလို ထောက်လှမ်းရေး သင်တန်းတွေကို ပြည်ပကနေ တက်ရောက်လာတဲ့ ဦးတင်ဦးကို နှေးကွေးလေးလံပြီး အလုပ်သိပ်မဖြစ်တဲ့ စစ်ထောက်လှမ်းအား ပြုပြင်ပြောင်းလဲရေး လုပ်ပေးဖို့ ဦးနေဝင်းက ခိုင်းပါတယ် ။
အဲဒီမှာ ပြဿနာရှိလာပါတယ် ။
စစ်ရုံးအသိုင်းအဝိုင်းက စစ်ဆင်ရေး အတွေ့အကြုံမရှိတဲ့ ဦးတင်ဦး(မျက်မှန်ကြီး)ကို အယုံအကြည်မရှိပါဘူး ။ အထူးသဖြင့် ထောက်လှမ်းရေးဌာနကို ဦးစီးနေတဲ့ CIA သင်တန်းဆင်း ဗိုလ်မှူးချုပ် မောင်မောင် နဲ့ ဗိုလ်မှူးကြီးမောင်လွင် (မူလ ပို့စ် မှာ ဦးထင်ကျော်ရဲ့ဇနီး ဒေါ်စုစုလွင်ရဲ့ ဖခင်လို့ ယူဆကြောင်း ရေးထားပေမယ့် မန့် အချို့မှာ မဟုတ်ကြောင်း ရေးထားတာ တွေ့ရပါတယ်). တို့ဖြစ်ပါတယ် ။
ဦးတင်ဦး(မျက်မှန်ကြီး)ဟာ ထောက်လှမ်းရေးကို ပြုပြင်ဖို့ အားထုတ်ပေမယ့် သူ့ရှေ့က ခံနေတဲ့ အုတ်တံကြီးတွေကို ကျော်လွှားမရလို့ အခက်တွေ့နေရပါတယ် ။ ပြုပြင်ပြောင်းလဲချင်နေတဲ့ ဦးနေဝင်းက သူ့ရဲ့ အခက်အခဲကို သိသွားပြီး ၁၉၆၁ ဖေဖေါ်ဝါရီလ မှာပဲ ဗိုလ်မှူးချုပ်မောင်မောင်ကို ဖယ်ရှားပြီး ထောက်လှမ်းရေး အဖွဲ့ကြီးကို ဦးတင်ဦးလက်ထဲ အပ်ပေးခဲ့ပါတယ် ။
ထိုအချိန်မှ စပြီး....
ဦးနေဝင်းကိုယ်ပွားလို့ တင်စားခေါ်ရမယ့် ဗိုလ်မှူးချုပ်တင်ဦး(မျက်မှန်ကြီး) ဟာ ၁၉၈၁ အထိ တပ်မတော် အတွင်း၌ လည်းကောင်း ၁၉၈၃ အထိ လမ်းစဉ်ပါတီ အတွင်း၌ နံပါတ် ၁ ဦးနေဝင်း နဲ့ နံပါတ် ၂ သမ္မတကြီး ဦးစန်းယု ကြား ထဲက နံပါတ် တစ် နှစ်ပိုင်း တပိုင်း အဖြစ် နောက်ကွယ်မှာ သတ်မှတ်ရလောက်အောင် ဩဇာ ကြီးခဲ့ရပါတယ် ။
အဲဒီအချိန်တွေမှာပဲ လက်ဇောင်းထက်နေတဲ့ ဦးတင်ဦး(မျက်မှန်ကြီး) နဲ့ ဦးနေဝင်းရဲ့ ငယ်စဉ်ကတည်းက လုပ်ဖေါ်ကိုင်ဖက် ကာချုပ်ကြီး ဗိုလ်ချုပ်တင်ဦး တို့ ဦးနေဝင်းရှေ့မှာပဲ ပြဿနာတွေ တက်ခဲ့ကြပါတယ် ။
ဦးနေဝင်း အတွက် အိပ်မပျော်တဲ့ ကာလတွေဟာ သူယုံကြည်ထားတဲ့ တင်ဦး ၂ ဦးကြားမှာ ၁၉၇၆ ခုနှစ်အတွင်း ဖြစ်ပေါ်ခဲ့ရပါတယ် ။
ဖြစ်ပုံကတော့........?