ပြည်နယ်မြို့တော် စစ်တွေနှင့် တံတားတစ်စင်းသာ ခြားသော မြို့ကို ရက္ခိုင့်တပ်တော် (AA) က သိမ်းပိုက်လိုက်ပြီဖြစ်သည်။ ထိုတံတားကို စစ်ကောင်စီတပ်က ဖောက်ခွဲဖျက်ဆီးထားသည်။
ဒေသကွပ်ကဲမှုစစ်ဌာနချုပ် (စစ်တွေ) လက်အောက်ခံ အဆိုပါ တပ်ရင်းကို ဖေဖော်ဝါရီ ၂၃ ရက်နေ့တွင် AA က စတင်ထိုးစစ်ဆင်ခြင်းဖြစ်သည်။
မြို့မရဲစခန်းကို ဖေဖော်ဝါရီ ၂၂ တွင် သိမ်းပြီးနောက် ဆက်တိုက်ထိုးစစ်ဆင်ခြင်းဖြစ်ရာ AA ၏ စခန်းသိမ်းပွဲသည် ၁၁ ရက်ကြာမြင့်ခဲ့သည်။
စခန်းသိမ်းပွဲမှ ရရှိသော လက်နက်ခဲယမ်းများ၊ ဖမ်ဆီးရမိသည့် စစ်သုံ့ပန်းများနှင့် ပတ်သက်၍ ဖော်ပြခြင်းမရှိသေးပေ။
ရဲစခန်းနှင့် တစ်ခုတည်းသော တပ်ရင်းတို့ ကျဆုံးသွား၍ မြို့နယ်တစ်ခုလုံး AA လက်အောက် ကျရောက်သွားခြင်းဖြစ်သည်။
ပုဏ္ဏားကျွန်းမြို့ကို လက်လွှတ်လိုက်ရသည့် စစ်ကောင်စီတပ်က ရသေ့တောင်-ပုဏ္ဏားကျွန်းကားလမ်းမရှိ စေတီပြင်တံတားကို ယမန်နေ့ (မတ်လ ၄) ညနေ ၅ နာရီခန့်တွင် ဂျက်တိုက်လေယာဉ် ၂ စီးဖြင့် ၁၂ ကြိမ်တိုင် လာရောက်ပစ်ခတ်ဖျက်ဆီးသည်ဟု AA က ထုတ်ပြန်သည်။
စစ်တွေခရိုင်တွင် စစ်တွေ၊ ပုဏ္ဏားကျွန်း၊ ပေါက်တော၊ ရသေ့တောင်မြို့နယ်တို့ရှိသည့်အနက်မှ ၂ မြို့နယ်ကို AA က သိမ်းပိုက်လိုက်ပြီဖြစ်သည်။ ပေါက်တောကို ဇန်နဝါရီ ၂၀ တွင် သိမ်းသည်။ ရသေ့တောင်တွင် ခြေမြန်တပ်ရင်း ၃ ရင်းမှလွဲ၍ တပ်စခန်းအားလုံးကို AA က သိမ်းပိုက်ထားပြီး ဆက်လက်ထိုးစစ်ဆင်နေဆဲဟု ဆိုသည်။
အထွေထွေအုပ်ချုပ်ရေးဦးစီးဌာန၏ ၂၀၁၉ ခုနှစ် အချက်အလက်များအရ လူဦးရေ ၁၄၀၀၀၀ နီးပါး နေထိုင်လျက်ရှိသော ပုဏ္ဏားကျွန်းမြို့နယ်သည် ပြည်နယ်မြို့တော် စစ်တွေနှင့် ၂၁ မိုင်ခန့်သာ ဝေးသည်။ ရဲစခန်းနှင့် ၅၅၀ တပ်ရင်းတို့သည် ရန်ကုန်-စစ်တွေကားလမ်းပေါ်တွင် တည်ရှိသည်။
ထိုတပ်ရင်း မကျမီ စစ်ကောင်စီတပ်က မြေပြင်စစ်ကူပို့သော်လည်း မြို့အဝင် တံတားထိပ်တွင်ပင် AA က ကြားဖြတ်တိုက်ခိုက်မှုကြောင့် အရာမထင်ဘဲ မြို့ကို လက်လွှတ်လိုက်ရခြင်းဖြစ်သည်။
ဖေဖော်ဝါရီလ ၂၈ ရက်နေ့ နေ့လယ်တွင် စစ်တွေမြို့မှ ပုဏ္ဏားကျွန်းမြို့သို့ စစ်ကူလာသည့် စစ်ကောင်စီတပ် စစ်ကြောင်းကို မင်းချောင်း (အမြင့်ကျွန်း) တံတားထိပ်အရောက်တွင် စောင့်ကြိုတိုက်ခိုက်ရာ စစ်ကြောင်းနှင့်အတူ ပါလာသည့် သံချပ်ကာကား ၂ စီး မီးလောင်ပျက်စီးသွားကြောင်း AA က မတ်လ ၁ ရက်နေ့ နေ့လယ်တွင် ရုပ်သံထုတ်ပြန်သည်။
တိုက်ပွဲအတွင်း နှစ်ဖက်တပ်ဖွဲ့ဝင် မည်မျှသေဆုံးဒဏ်ရာရရှိသည်ကို မသိရပေ။
ကျောက်တော်နှင့် မင်းပြား မြစ်ကြောင်းအတွင်း စစ်သင်္ဘောများ တိုက်ခိုက်ဖျက်ဆီးခံရပြီးနောက်ပိုင်း ရေကြောင်းမှ စစ်ကူပို့ရန်လည်း စစ်ကောင်စီတပ်အတွက် ခက်ခဲသွားသည်။
မြေပြင်စစ်ကူတပ်များကို ရဟတ်ယာဉ်ဖြင့် ချပေးရာတွင်လည်း AA က ကြားဖြတ်တိုက်ခိုက်ပြန်သဖြင့် အများအပြားသေကျေပျက်စီးကုန်သည်။
ဖေဖော်ဝါရီ ၂၄ နှင့် ၂၅ ရက်နေ့တို့တွင် ရမ်းဗြဲမြို့နယ်သို့ ရဟတ်ယာဉ် ၇ စီးဖြင့် ၂ ကြိမ်ပို့ပေးသော အင်အား ၁၂၀ ခန့်ပါ စစ်ကူတပ်ကို ကြားဖြတ်တိုက်ခိုက်ရာ ၈၀ ကျော် သေသည်ဟု ဖေဖော်ဝါရီ ၂၆ နံနက်တွင် AA က ထုတ်ပြန်သည်။ သိမ်းဆည်းရရှိသည့် လက်နက်ခဲယမ်းများကိုလည်း ဖော်ပြသည်။
ရမ်းဗြို့မြို့ မည်သည့်နေရာတွင် တိုက်ခိုက်သည်ကို AA က ဖော်ပြခြင်းမရှိသကဲ့သို့ စစ်ကောင်စီတပ်၏ စစ်ကူအင်အားနှင့် သေဆုံးအရေအတွက်ကိုလည်း Myanmar Now က သီးခြားအတည်မပြုနိုင်ပေ။
ခုခံစစ်ကို တစ်ဆင့်ချင်း ပြင်ဆင်နေသော စစ်ကောင်စီတပ်က ကုန်းလမ်းမှ ဝင်ရောက်လာမည့် ရက္ခိုင့်တပ်တော်ထိုးစစ်ကို ဟန့်တားရန် တံတားများကို ဖောက်ခွဲဖျက်ဆီးပစ်နေကြောင်းလည်း AA က ပြောသည်။
စစ်တွေမြို့အဝင် မင်းချောင်းတံတားကို ဖေဖော်ဝါရီ ၁၂ ရက်နေ့တွင် စစ်ကောင်စီတပ်က ဖောက်ခွဲဖျက်ဆီးသည်ဟု ညီနောင်သုံးဖွဲ့၏ ဖေဖော်ဝါရီ ၁၇ ထုတ်ပြန်ချက်တွင် ဖော်ပြထားသည်။
AA ၏ မနားတမ်းထိုးစစ်ကြောင့် အခြေစိုက်တပ်ရင်းများ ဆက်တိုက်ကျဆုံးကာ မြို့နယ်များ လက်လွှတ်ဆုံးရှုံးနေရခြင်းနှင့် ပတ်သက်၍ စစ်ကောင်စီပြန်ကြားရေးဘက်က သတင်းမထုတ်ပြန်ပေ။
တံတားများကို ဖောက်ခွဲဖျက်ဆီးသည်ဆိုသော ညီနောင်သုံးဖွဲ့၏ ပြောဆိုချက်ကိုလည်း စစ်ကောင်စီဘက်က ပြန်လည်ချေပခြင်း မရှိပေ။
AA ဘက်ကမူ တိုက်ပွဲသတင်းများကို နေ့စဉ်ထုတ်ပြန်လျက်ရှိပြီး ၈ ကြိမ်မြောက် သတင်းစာရှင်းလင်းပွဲကို ယမန်နေ့ (မတ်လ ၄) တွင် ပြုလုပ်သည်။
ထိုသတင်းစာရှင်းလင်းပွဲတွင် ရခိုင်ပြည်နယ်တွင် စစ်ကောင်စီနှင့် အပစ်အခတ်ရပ်စဲရန် အစီအစဉ်မရှိကြောင်း၊ ရခိုင်ဒေသတစ်ခုလုံး လွတ်မြောက်ရန် ဆက်လက်တိုက်ပွဲဝင်မည်ဖြစ်ကြောင်း AA ပြောရေးဆိုခွင့်ရှိသူ ဦးခိုင်သုခက ပြောသည်။
“ကျွန်တော်တို့ ကိုယ်ပိုင်ပြဋ္ဌာန်းခွင့်အပြည့်အဝရှိတဲ့၊ ရခိုင့်ကြမ္မာကို ရခိုင်ဖန်တီးနိုင်တဲ့ အာရက္ခပြည်ရဲ့ အနာဂတ်ကို ကျွန်တော်တို့ကိုယ်တိုင် ကျွန်တော်တို့လက်နဲ့ တည်ဆောက်သွားဖို့ဖြစ်တယ်ဆိုတာကို အခိုင်အမာပြောလိုပါတယ်” ဟု ဦးခိုင်သုခက သတင်းထောက်များကို ပြောသည်။
ဖမ်းဆီးရမိထားသော စစ်ကောင်စီတပ်သားများနှင့် ၎င်းတို့၏ မိသားစုဝင်အများအပြားကိုလည်း AA က စောင့်ရှောက်ထားကြောင်းလည်း ဓာတ်ပုံများနှင့်တကွ ထုတ်ပြန်ထားသည်။
ထို့ပြင် လက်နက်ချ အလင်းဝင်သည့် စစ်ကောင်စီတပ်ဖွဲ့ဝင်များ၊ ဖမ်းဆီးရမိထားသူများ၏ ပြောဆိုချက်များကိုလည်း AA က ဆက်တိုက်ထုတ်ပြန်လျက်ရှိသည်။
မြောက်ဦးအခြေစိုက် ခမရ (၃၇၈) တပ်ရင်းစခန်းအတွင်း အချုပ်သား ၇ ဦးကို ဇန်နဝါရီလ ၂၃ ရက်နေ့က ပစ်သတ်ရာတွင် အမိန့်ပေးစေခိုင်းသူများဟု AA က ဆိုသည့် စစ်ကောင်စီတပ်အရာရှိ ၃ ဦးက ၎င်းတို့၏ ကျူးလွန်မှုများကို ထွက်ဆိုထားကြသည်။
မင်းပြားမြို့နယ်၊ င/တန်ပျင်းကျေးရွာတွင် မုဒိမ်းကျင့် သတ်ဖြတ်ရာတွင် ကိုယ်တိုင်ပါဝင်ခဲ့သူဟု AA က ဆိုသည့် စစ်ကောင်စီတပ်သားတစ်ဦး၏ ဝန်ခံထွက်ဆိုချက်ကိုလည်း မတ်လ ၃ ရက်နေ့တွင် ထုတ်ပြန်ထားသည်။
ယခု AA သိမ်းပိုက်လိုက်သည့် ခမရ (၅၅၀) တပ်ရင်းသည်လည်း ၂၀၂၂ ခုနှစ် နိုဝင်ဘာလအတွင်း ပုဏ္ဏားကျွန်းမြို့နယ်၊ ဆင်အင်းကြီးကျေးရွာသို့ ဝင်ရောက်ကာ နေအိမ်များကို မီးရှို့ဖျက်ဆီးပြီး အရပ်သား ၉ ဦးကို ပစ်သတ်ခဲ့သည့် တပ်ရင်းဖြစ်ကြောင်း စွပ်စွဲခံထားရသည်။
ထိုတပ်ရင်းကို အပြင်းထန်ဆုံး လက်စားချေ တုံ့ပြန်မည်ဖြစ်ကြောင်း AA က ထိုနှစ် နိုဝင်ဘာ ၁၁ ရက်စွဲဖြင့် သတင်းထုတ်ပြန်သည်။
ဖြစ်စဉ်သည် အချိန် ၁ နှစ်ကျော်ကြာပြီဖြစ်၍ ထိုစဉ်က မီးရှို့၊ သတ်ဖြတ်မှုကျုးလွန်ရာတွင် ပါဝင်သူများ ၅၅၀ တပ်ရင်းတွင် ဆက်လက်တာဝန်ထမ်းဆောင်နေခြင်း ရှိမရှိကို Myanmar Now အနေဖြင့် စုံစမ်းနိုင်ခြင်းမရှိပါ။ AA ကလည်း တစ်စုံတစ်ရာ မထုတ်ပြန်သေးပေ။
ရခိုင်ပြည်နယ် ၁၀၂၇ စစ်ဆင်ရေး ၃ လကျော်အတွင်း AA က ချင်းပြည်နယ် ပလက်ဝမြို့၊ ရခိုင်ပြည်နယ် ကျောက်တော်၊ မြောက်ဦး၊ မင်းပြား၊ ပေါက်တော၊ မြေပုံ၊ ယခုသိမ်းပိုက်လိုက်သည့် ပုဏ္ဏားကျွန်းမြို့အပါအဝင် မြို့ ၇ မြို့ကို သိမ်းပိုက်ထားပြီဖြစ်သည်။
သိမ်းပိုက်ထားသည့် မြို့နယ်တချို့တွင် မြို့တွင်းသန့်ရှင်းရေးများပြုလုပ်လျက်ရှိပြီး ပြန်လည်ထူထောင်ရေးလုပ်ငန်းများ စတင်နေသည်ကို ဒေသတွင်းမီဒီယာတချို့တွင် တွေ့ရသည်။
ထိုမြို့နယ်များသည် အဖိနှိပ်ခံ ပြည်သူအားလုံးအတွက် လုံခြုံသည့်နေရာများဖြစ်၍ မည်သူမဆို လာရောက်တိမ်းရှောင်နေထိုင်နိုင်ပါကြောင်းလည်း AA က ဖေဖော်ဝါရီ ၂၀ ရက်နေ့တွင် ဖိတ်ခေါ်ထားသည်။
သို့သော် AA သိမ်းပိုက်ထားသည့် မြို့နယ်တချို့ကို စစ်ကောင်စီလေတပ်က မကြာခဏ ဗုံးကြဲတိုက်ခိုက်လျက်ရှိသည်။
မင်းပြားမြို့နယ်ရှိ မင်းဖူးဆေးရုံကို ဖေဖော်ဝါရီလ ၂၇ ရက်နေ့ နံနက်တွင် စစ်ကောင်စီလေတပ်က ဗုံးကြဲတိုက်ခိုက်ကြောင်း ထိုနေ့ နေ့လယ်တွင် AA က အပျက်အစီးဓာတ်ပုံများနှင့်တကွ သတင်းထုတ်ပြန်သည်။
ထုတ်ပြန်သော ဓာတ်ပုံမှတ်တမ်းများတွင် ဆေးရုံတစ်ခုလုံး ပျက်စီးသွားသည်ကို တွေ့ရသည်။
ဗုံးကြဲတိုက်ခိုက်ခံရသည့် မင်းဖူးဆေးရုံသည် စစ်ကောင်စီတပ်ဖွဲ့ဝင် သုံ့ပန်းများနှင့် မိသားစုဝင်များကို ဆေးကုသပေးနေသော အရပ်ဘက်ဆေးရုံဖြစ်ကြောင်း၊ ဆေးကုသမှုခံယူနေကြသည့် အရပ်သားများ၊ ဆေးရုံဝန်ထမ်းများ ပြင်းထန်စွာ ထိခိုက်ဒဏ်ရာရရှိသွားကြောင်း AA က ဆိုသည်။
စစ်ကောင်စီတပ်ကို မြေပြင်နှင့် ရေပြင်တွင် စစ်ရေးအသာစီးရနေသော AA သည် လေကြောင်းမှ ဗုံးကြဲတိုက်ခိုက်မှုကိုမူ ပြန်လည်တုံ့ပြန်နိုင်စွမ်းမရှိသေးပေ။
သိမ်းပိုက်ထားပြီးမြို့များကို လေကြောင်းတိုက်ခိုက်မှုအန္တရာယ်မှ ကာကွယ်နိုင်ရန် လေကြောင်းအချက်ပြစနစ်များ တပ်ဆင်နိုင်ရန် အစီအစဉ်များပြုလုပ်နေကြောင်း AA ပြောခွင့်ရ ဦးခိုင်သုခက ယမန်နေ့ သတင်းစာရှင်းလင်းပွဲတွင် ပြောထားသည်။
AA သည် ရခိုင်ပြည်နယ်မြောက်ပိုင်းတွင် ၁၃ မြို့နယ်ရှိသည့်အနက်မှ ၆ မြို့နယ်ကို သိမ်းပိုက်လိုက်ပြီဖြစ်ပြီး ရသေ့တောင်၊ ဘူးသီးတောင်၊ မောင်တောမြို့နယ်တို့ကို ရရှိရေး ဆက်လက်ထိုးစစ်ဆင်နေဆဲဖြစ်သည်။
